Devi Kawacha
Devi Kavacha
দেবী কবচম্
Devi Kawacha
Devi Kavacha
দেবী কবচম্
|| অথ দেবী কবচম্ ||
অস্য শ্রীচণ্ডীকবচস্য ব্রহ্মা ঋষিঃ , অনুষ্টুপ্ ছন্দঃ ,
চামুণ্ডা দেবতা , অঙ্গন্যাসোক্তমাতরো বীজম্ ,
দিগ্বন্ধদেবতাস্তৎবম্ , শ্রীজগদম্বাপ্রীত্যর্থে জপে বিনিয়োগঃ |
ওঁ নমশ্চণ্ডিকায়ৈ |
মার্কণ্ডেয় উবাচ |
ওঁ যদ্গুহ্যং পরমং লোকে সর্বরক্ষাকরং নৃণাম্ |
যন্ন কস্যচিদাখ্যাতং তন্মে ব্রূহি পিতামহ || ১||
ব্রহ্মোবাচ |
অস্তি গুহ্যতমং বিপ্র সর্বভূতোপকারকম্ |
দেব্যাস্তু কবচং পুণ্যং তচ্ছৃণুষ্ব মহামুনে || ২||
প্রথমং শৈলপুত্রীতি দ্বিতীয়ং ব্রহ্মচারিণী |
তৃতীয়ং চন্দ্রঘণ্টেতি কূষ্মাণ্ডেতি চতুর্থকম্ || ৩||
পঞ্চমং স্কন্দমাতেতি ষষ্ঠং কাত্যায়নী তথা |
সপ্তমং কালরাত্রিশ্চ মহাগৌরীতি চাষ্টমম্ || ৪||
নবমং সিদ্ধিদাত্রী চ নবদুর্গাঃ প্রকীর্তিতাঃ |
উক্তান্যেতানি নামানি ব্রহ্মণৈব মহাত্মনা || ৫||
অগ্নিনা দহ্যমানাস্তু শত্রুমধ্যগতা রণে |
বিষমে দুর্গমে চৈব ভয়ার্তাঃ শরণং গতাঃ || ৬.
ন তেষাং জায়তে কিঞ্চিদশুভং রণসঙ্কটে |
আপদং ন চ পশ্যন্তি শোকদুঃখভয়ঙ্করীম্ || ৭||
যৈস্তু ভক্ত্যা স্মৃতা নিত্যং তেষাং বৃদ্ধিঃ প্রজায়তে |
যে ৎবাং স্মরন্তি দেবেশি রক্ষসি তান্ন সংশয়ঃ || ৮||
প্রেতসংস্থা তু চামুণ্ডা বারাহী মহিষাসনা |
ঐন্দ্রী গজসমারূঢা বৈষ্ণবী গরুডাসনা || ৯||
নারসিংহী মহাবীর্যা শিবদূতী মহাবলা |
মাহেশ্বরী বৃষারূঢা কৌমারী শিখিবাহনা || ১০||
লক্ষ্মীঃ পদ্মাসনা দেবী পদ্মহস্তা হরিপ্রিয়া |
শ্বেতরূপধরা দেবী ঈশ্বরী বৃষবাহনা || ১১||
ব্রাহ্মী হংসসমারূঢা সর্বাভরণভূষিতা |
ইত্যেতা মাতরঃ সর্বাঃ সর্বয়োগসমন্বিতাঃ || ১২||
নানাভরণশোভাঢ্যা নানারত্নোপশোভিতাঃ |
শ্রৈষ্ঠৈশ্চ মৌক্তিকৈঃ সর্বা দিব্যহারপ্রলম্বিভিঃ || ১৩||
ইন্দ্রনীলৈর্মহানীলৈঃ পদ্মরাগৈঃ সুশোভনৈঃ |
দৃশ্যন্তে রথমারূঢা দেব্যঃ ক্রোধসমাকুলাঃ || ১৪||
শঙ্খং চক্রং গদাং শক্তিং হলং চ মুসলায়ুধম্ |
খেটকং তোমরং চৈব পরশুং পাশমেব চ || ১৫||
কুন্তায়ুধং ত্রিশূলং চ শার্ঙ্গমায়ুধমুত্তমম্ |
দৈত্যানাং দেহনাশায় ভক্তানামভয়ায় চ || ১৬||
ধারয়ন্ত্যায়ুধানীত্থং দেবানাং চ হিতায় বৈ |
নমস্তেঽস্তু মহারৌদ্রে মহাঘোরপরাক্রমে || ১৭||
মহাবলে মহোৎসাহে মহাভয়বিনাশিনি |
ত্রাহি মাং দেবি দুষ্প্রেক্ষ্যে শত্রূণাং ভয়বর্ধিনি || ১৮||
প্রাচ্যাং রক্ষতু মামৈন্দ্রী আগ্নেয়্যামগ্নিদেবতা |
দক্ষিণেঽবতু বারাহী নৈরৃত্যাং খড্গধারিণী || ১৯||
প্রতীচ্যাং বারুণী রক্ষেদ্বায়ব্যাং মৃগবাহিনী |
উদীচ্যাং পাতু কৌবেরী ঈশান্যাং শূলধারিণী || ২০||
ঊর্ধ্বং ব্রহ্মাণী মে রক্ষেদধস্তাদ্বৈষ্ণবী তথা |
এবং দশ দিশো রক্ষেচ্চামুণ্ডা শববাহনা || ২১||
জয়া মামগ্রতঃ পাতু বিজয়া পাতু পৃষ্ঠতঃ |
অজিতা বামপার্শ্বে তু দক্ষিণে চাপরাজিতা || ২২||
শিখাং মে দ্যোতিনী রক্ষেদুমা মূর্ধ্নি ব্যবস্থিতা |
মালাধরী ললাটে চ ভ্রুবৌ রক্ষেদ্যশস্বিনী || ২৩||
নেত্রয়োশ্চিত্রনেত্রা চ যমঘণ্টা তু পার্শ্বকে |
ত্রিনেত্রা চ ত্রিশূলেন ভ্রুবোর্মধ্যে চ চণ্ডিকা || ২৪||
শঙ্খিনী চক্ষুষোর্মধ্যে শ্রোত্রয়োর্দ্বারবাসিনী |
কপোলৌ কালিকা রক্ষেৎ কর্ণমূলে তু শঙ্করী || ২৫||
নাসিকায়াং সুগন্ধা চ উত্তরোষ্ঠে চ চর্চিকা |
অধরে চামৃতাবালা জিহ্বায়াং চ সরস্বতী || ২৬||
দন্তান্ রক্ষতু কৌমারী কণ্ঠদেশে তু চণ্ডিকা |
ঘণ্টিকাং চিত্রঘণ্টা চ মহামায়া চ তালুকে || ২৭||
কামাক্ষী চিবুকং রক্ষেদ্বাচং মে সর্বমঙ্গলা |
গ্রীবায়াং ভদ্রকালী চ পৃষ্ঠবংশে ধনুর্ধরী || ২৮||
নীলগ্রীবা বহিঃ কণ্ঠে নলিকাং নলকূবরী |
স্কন্ধয়োঃ খড্গিনী রক্ষেদ্ বাহূ মে বজ্রধারিণী || ২৯||
হস্তয়োর্দণ্ডিনী রক্ষেদম্বিকা চাঙ্গুলীষু চ |
নখাঞ্ছূলেশ্বরী রক্ষেৎ কুক্ষৌ রক্ষেন্নরেশ্বরী || ৩০||
স্তনৌ রক্ষেন্মহাদেবী মনঃশোকবিনাশিনী |
হৃদয়ে ললিতা দেবী উদরে শূলধারিণী || ৩১||
নাভৌ চ কামিনী রক্ষেদ্ গুহ্যং গুহ্যেশ্বরী তথা |
মেঢ্রং রক্ষতু দুর্গন্ধা পায়ুং মে গুহ্যবাহিনী || ৩২||
কট্যাং ভগবতী রক্ষেদূরূ মে মেঘবাহনা |
জঙ্ঘে মহাবলা রক্ষেৎ জানূ মাধবনায়িকা || ৩৩||
গুল্ফয়োর্নারসিংহী চ পাদপৃষ্ঠে তু কৌশিকী |
পাদাঙ্গুলীঃ শ্রীধরী চ তলং পাতালবাসিনী || ৩৪||
নখান্ দংষ্ট্রকরালী চ কেশাংশ্চৈবোর্ধ্বকেশিনী |
রোমকূপেষু কৌমারী ৎবচং যোগীশ্বরী তথা || ৩৫||
রক্তমজ্জাবসামাংসান্যস্থিমেদাংসি পার্বতী |
অন্ত্রাণি কালরাত্রিশ্চ পিত্তং চ মুকুটেশ্বরী || ৩৬||
পদ্মাবতী পদ্মকোশে কফে চূডামণিস্তথা |
জ্বালামুখী নখজ্বালামভেদ্যা সর্বসন্ধিষু || ৩৭||
শুক্রং ব্রহ্মাণী মে রক্ষেচ্ছায়াং ছত্রেশ্বরী তথা |
অহঙ্কারং মনো বুদ্ধিং রক্ষেন্মে ধর্মধারিণী || ৩৮||
প্রাণাপানৌ তথা ব্যানমুদানং চ সমানকম্ |
বজ্রহস্তা চ মে রক্ষেৎ প্রাণান্ কল্যাণশোভনা || ৩৯||
রসে রূপে চ গন্ধে চ শব্দে স্পর্শে চ যোগিনী |
সত্ত্বং রজস্তমশ্চৈব রক্ষেন্নারায়ণী সদা || ৪০||
আয়ূ রক্ষতু বারাহী ধর্মং রক্ষতু পার্বতী |
যশঃ কীর্তিং চ লক্ষ্মীং চ সদা রক্ষতু বৈষ্ণবী || ৪১||
গোত্রমিন্দ্রাণী মে রক্ষেৎ পশূন্ রক্ষেচ্চ চণ্ডিকা |
পুত্রান্ রক্ষেন্মহালক্ষ্মীর্ভার্যাং রক্ষতু ভৈরবী || ৪২||
ধনেশ্বরী ধনং রক্ষেৎ কৌমারী কন্যকাং তথা |
পন্থানং সুপথা রক্ষেন্মার্গং ক্ষেমঙ্করী তথা || ৪৩||
রাজদ্বারে মহালক্ষ্মীর্বিজয়া সতত স্থিতা |
রক্ষাহীনং তু যৎ স্থানং বর্জিতং কবচেন তু || ৪৪||
তৎসর্বং রক্ষ মে দেবি জয়ন্তী পাপনাশিনী |
সর্বরক্ষাকরং পুণ্যং কবচং সর্বদা জপেৎ || ৪৫||
ইদং রহস্যং বিপ্রর্ষে ভক্ত্যা তব ময়োদিতম্ ||
পাদমেকং ন গচ্ছেৎ তু যদীচ্ছেচ্ছুভমাত্মনঃ || ৪৬||
কবচেনাবৃতো নিত্যং যত্র যত্রৈব গচ্ছতি |
তত্র তত্রার্থলাভশ্ব বিজয়ঃ সার্বকালিকঃ || ৪৭||
যং যং চিন্তয়তে কামং তং তং প্রাপ্নোতি নিশ্চিতম্ |
পরমৈশ্বর্যমতুলং প্রাপ্স্যতে ভূতলে পুমান্ || ৪৮||
নির্ভয়ো জায়তে মর্ত্যঃ সঙ্গ্রামেষ্বপরাজিতঃ |
ত্রৈলোক্যে তু ভবেৎপূজ্যঃ কবচেনাবৃতঃ পুমান্ || ৪৯||
ইদং তু দেব্যাঃ কবচং দেবানামপি দুর্লভম্ |
যঃ পঠেৎপ্রয়তো নিত্যং ত্রিসন্ধ্যং শ্রদ্ধয়ান্বিতঃ || ৫০||
দৈবীকলা ভবেত্তস্য ত্রৈলোক্যে চাপরাজিতঃ |
জীবেদ্বর্ষশতং সাগ্রমপমৃত্যুবিবর্জিতঃ || ৫১||
নশ্যন্তি ব্যাধয়ঃ সর্বে লূতাবিস্ফোটকাদয়ঃ |
স্থাবরং জঙ্গমং চৈব কৃত্রিমং চৈব যদ্বিষম্ || ৫২||
অভিচারাণি সর্বাণি মন্ত্রয়ন্ত্রাণি ভূতলে |
ভূচরাঃ খেচরাশ্চৈব কুলজাশ্চৌপদেশিকাঃ || ৫৩||
সহজা কুলজা মালা ডাকিনী শাকিনী তথা |
অন্তরিক্ষচরা ঘোরা ডাকিন্যশ্চ মহারবাঃ || ৫৪||
গ্রহভূতপিশাচাশ্চ যক্ষগন্ধর্বরাক্ষসাঃ |
ব্রহ্মরাক্ষসবেতালাঃ কূষ্মাণ্ডা ভৈরবাদয়ঃ || ৫৫||
নশ্যন্তি দর্শনাত্তস্য কবচেনাবৃতো হি যঃ |
মানোন্নতির্ভবেদ্রাজ্ঞস্তেজোবৃদ্ধিঃ পরা ভবেৎ || ৫৬||
যশোবৃদ্ধির্ভবেৎ পুংসাং কীর্তিবৃদ্ধিশ্চ জায়তে |
তস্মাৎ জপেৎ সদা ভক্তঃ কবচং কামদং মুনে || ৫৭||
জপেৎ সপ্তশতীং চণ্ডীং কৃৎবা তু কবচং পুরা |
নির্বিঘ্নেন ভবেৎ সিদ্ধিশ্চণ্ডীজপসমুদ্ভবা || ৫৮||
যাবদ্ভূমণ্ডলং ধত্তে সশৈলবনকাননম্ |
তাবত্তিষ্ঠতি মেদিন্যাং সন্ততিঃ পুত্রপৌত্রিকী || ৫৯||
দেহান্তে পরমং স্থানং সুরৈরপি সুদুর্লভম্ |
প্রাপ্নোতি পুরুষো নিত্যং মহামায়াপ্রসাদতঃ || ৬০||
তত্র গচ্ছতি গৎবাসৌ পুনশ্চাগমনং নহি |
লভতে পরমং স্থানং শিবেন সমতাং ব্রজেৎ || ৬১||
|| ইতি শ্রীমার্কণ্ডেয়পুরাণে হরিহরব্রহ্মবিরচিতং
দেবীকবচং সমাপ্তম্ ||