Shri Shibkrtam Durga Stotram
শ্রীশিবকৃতং দুর্গাস্তোত্রম্
Shri Shibkrtam Durga Stotram
|| শ্রীশিবকৃতং দুর্গাস্তোত্রম্ ||
রক্ষ রক্ষ মহাদেবি দুর্গে দুর্গতিনাশিনি |
মাং ভক্তমনুরক্তং চ শত্রুগ্রস্তং কৃপাময়ি || ১||
বিষ্ণুমায়ে মহাভাগে নারায়ণি সনাতনি |
ব্রহ্মস্বরূপে পরমে নিত্যানন্দস্বরূপিণী || ২||
ৎবং চ ব্রহ্মাদিদেবানামম্বিকে জগদম্বিকে |
ৎবং সাকারে চ গুণতো নিরাকারে চ নির্গুণাৎ || ৩||
মায়য়া পুরুষস্ত্বং চ মায়য়া প্রকৃতিঃ স্বয়ম্ |
তয়োঃ পরং ব্রহ্ম পরং ৎবং বিভর্ষি সনাতনি || ৪||
বেদানাং জননী ৎবং চ সাবিত্রী চ পরাৎপরা |
বৈকুণ্ঠে চ মহালক্ষ্মীঃ সর্বসম্পৎস্বরূপিণী || ৫||
মর্ত্যলক্ষ্মীশ্চ ক্ষীরোদে কামিনী শেষশায়িনঃ |
স্বর্গেষু স্বর্গলক্ষ্মীস্ত্বং রাজলক্ষ্মীশ্চ ভূতলে || ৬||
নাগাদিলক্ষ্মীঃ পাতালে গৃহেষু গৃহদেবতা |
সর্বসস্যস্বরূপা ৎবং সর্বৈশ্বর্যবিধায়িনী || ৭||
রাগাধিষ্ঠাতৃদেবী ৎবং ব্রহ্মণশ্চ সরস্বতী |
প্রাণানামধিদেবী ৎবং কৃষ্ণস্য পরমাত্মনঃ || ৮||
গোলোকে চ স্বয়ং রাধা শ্রীকৃষ্ণস্যৈব বক্ষসি |
গোলোকাধিষ্ঠাতা দেবী বৃন্দাবনবনে বনে || ৯||
শ্রীরাসমণ্ডলে রম্যা বৃন্দাবনবিনোদিনী |
শতশৃঙ্গাধিদেবী ৎবং নাম্না চিত্রাবলীতি চ || ১০||
দক্ষকন্যা কুত্র কল্পে কুত্রকল্পে চ শৈলজা |
দেবমাতা দিতিস্ত্বং চ সর্বাধারা বসুন্ধরা || ১১||
ৎবমেব গঙ্গা তুলসী ৎবং চ স্বাহা স্বধা সতী |
ৎবদংশাংশাংশকলয়া সর্বদেবাদিয়োষিতঃ || ১২||
স্ত্রীরূপং চাপি পুরুষং দেবি ৎবং চ নপুংসকম্ |
বৃক্ষাণাং বৃক্ষরূপা ৎবং সৃষ্টৌ চাঙ্কুররূপিণী || ১৩||
বহ্নৌ চ দাহিকা শক্তির্জলে শৈত্যস্বরূপিণী |
সূর্যে তেজস্বরূপা চ প্রভারূপা চ সন্ততম্ || ১৪||
গন্ধরূপা চ ভূমৌ চ আকাশে শব্দরূপিণী |
শোভাস্বরূপা চন্দ্রে চ পদ্মসঙ্ঘে চ নিশ্চিতম্ || ১৫||
সৃষ্টৌ সৃষ্টিস্বরূপা চ পালনে পরিপালিকা |
মহামারী চ সংহারে জলে চ জলরূপিণী || ১৬||
ক্ষুৎ ৎবং দয়া ৎবং নিদ্রা ৎবং তৃষ্ণা ৎবং বুদ্ধিরূপিণী |
তুষ্টিস্ত্বং চপি পুষ্টিস্ত্বং শ্রদ্ধা ৎবং চ ক্ষমা স্বয়ম্ || ১৭||
শান্তিস্ত্বং চ স্বয়ং ভ্রান্তিঃ কান্তিস্ত্বং কীর্তিরেব চ |
লজ্জা ৎবং চ তথা মায়া ভুক্তিমুক্তিস্বরূপিণী || ১৮||
সর্বশক্তিস্বরূপা ৎবং সর্বসংপৎপ্রদায়িনী |
বেদেঽনির্বচনীয়া ৎবং ৎবাং ন জানাতি কশ্চন || ১৯||
সহস্রবক্ত্রস্ত্বাং স্তোতুং ন শক্তঃ সুরেশ্বরি |
বেদাঃ ন শক্তাঃ কো বিদ্বান্ ন চ শক্তা সরস্বতী || ২০||
স্বয়ং বিধাতা শক্তো ন ন চ বিষ্ণুঃ সনাতনঃ |
কিং স্তৌমি পঞ্চবক্ত্রেণ রণত্রস্তো মহেশ্বরি |
কৃপাং কুরু মহামায়ে মম শত্রুক্ষয়ং কুরু || ২১||
|| ইতি দুর্গাস্তোত্রং সংপূর্ণম্ ||