Devi Mahatmyam
দেবী মাহাত্ম্যম্
Devi Mahatmyam
|| দেবী মাহাত্ম্যম্ ||
%
|| শ্রীদুর্গায়ৈ নমঃ ||
|| অথ শ্রীদুর্গাসপ্তশতী ||
|| প্রথমোঽধ্যায়ঃ ||
বিনিয়োগঃ
অস্য শ্রী প্রথমচরিত্রস্য | ব্রহ্মা ঋষিঃ |
মহাকালী দেবতা | গায়ত্রী ছন্দঃ | নন্দা শক্তিঃ |
রক্তদন্তিকা বীজম্ | অগ্নিস্তত্ত্বম্ |
ঋগ্বেদঃ স্বরূপম্ | শ্রীমহাকালীপ্রীত্যর্থে
প্রথমচরিত্রজপে
বিনিয়োগঃ |
| ধ্যানম্ |
ওঁ খড্গং চক্রগদেষুচাপপরিঘাঞ্ছূলং ভুশুণ্ডীং শিরঃ
শঙ্খং সন্দধতীং করৈস্ত্রিনয়নাং সর্বাঙ্গভূষাবৃতাম্ |
নীলাশ্মদ্যুতিমাস্যপাদদশকাং সেবে মহাকালিকাং
যামস্তৌৎস্বপিতে হরৌ কমলজো হন্তুং মধুং কৌটভম্ ||
ওঁ নমশ্চণ্ডিকায়ৈ ||
ওঁ ঐং মার্কণ্ডেয় উবাচ || ১||
সাবর্ণিঃ সূর্যতনয়ো যো মনুঃ কথ্যতেঽষ্টমঃ |
নিশাময় তদুৎপত্তিং বিস্তরাদ্গদতো মম || ২||
মহামায়ানুভাবেন যথা মন্বন্তরাধিপঃ |
স বভূব মহাভাগঃ সাবর্ণিস্তনয়ো রবেঃ || ৩||
স্বারোচিষেঽন্তরে পূর্বং চৈত্রবংশসমুদ্ভবঃ |
সুরথো নাম রাজাভূৎসমস্তে ক্ষিতিমণ্ডলে || ৪||
তস্য পালয়তঃ সম্যক্ প্রজাঃ পুত্রানিবৌরসান্ |
বভূবুঃ শত্রবো ভূপাঃ কোলাবিধ্বংসিনস্তদা || ৫||
তস্য তৈরভবদ্ যুদ্ধমতিপ্রবলদণ্ডিনঃ |
ন্যূনৈরপি স তৈর্যুদ্ধে কোলাবিধ্বংসিভির্জিতঃ || ৬||
ততঃ স্বপুরমায়াতো নিজদেশাধিপোঽভবৎ |
আক্রান্তঃ স মহাভাগস্তৈস্তদা প্রবলারিভিঃ || ৭||
অমাত্যৈর্বলিভির্দুষ্টৈর্দুর্বলস্য দুরাত্মভিঃ |
কোশো বলং চাপহৃতং তত্রাপি স্বপুরে ততঃ || ৮||
ততো মৃগয়াব্যাজেন হৃতস্বাম্যঃ স ভূপতিঃ |
একাকী হয়মারুহ্য জগাম গহনং বনম্ || ৯||
স তত্রাশ্রমমদ্রাক্ষীদ্দ্বিজবর্যস্য মেধসঃ |
প্রশান্তশ্বাপদাকীর্ণং মুনিশিষ্যোপশোভিতম্ || ১০||
তস্থৌ কঞ্চিৎস কালং চ মুনিনা তেন সৎকৃতঃ |
ইতশ্চেতশ্চ বিচরংস্তস্মিন্ মুনিবরাশ্রমে || ১১||
সোঽচিন্তয়ত্তদা তত্র মমৎবাকৃষ্টমানসঃ |
মৎপূর্বৈঃ পালিতং পূর্বং ময়া হীনং পুরং হি তৎ || ১২||
মদ্ভৃত্যৈস্তৈরসদ্বৃত্তৈর্ধর্মতঃ পাল্যতে ন বা |
ন জানে স প্রধানো মে শূরো হস্তী সদামদঃ || ১৩||
মম বৈরিবশং যাতঃ কান্ ভোগানুপলপ্স্যতে |
যে মমানুগতা নিত্যং প্রসাদধনভোজনৈঃ || ১৪||
অনুবৃত্তিং ধ্রুবং তেঽদ্য কুর্বন্ত্যন্যমহীভৃতাম্ |
অসম্যগ্ব্যয়শীলৈস্তৈঃ কুর্বদ্ভিঃ সততং ব্যয়ম্ || ১৫||
সংচিতঃ সোঽতিদুঃখেন ক্ষয়ং কোশো গমিষ্যতি |
এতচ্চান্যচ্চ সততং চিন্তয়ামাস পার্থিবঃ || ১৬||
তত্র বিপ্রাশ্রমাভ্যাশে বৈশ্যমেকং দদর্শ সঃ |
স পৃষ্টস্তেন কস্ত্বং ভো হেতুশ্চাগমনেঽত্র কঃ || ১৭||
সশোক ইব কস্মাত্ত্বং দুর্মনা ইব লক্ষ্যসে |
ইত্যাকর্ণ্য বচস্তস্য ভূপতেঃ প্রণয়োদিতম্ || ১৮||
প্রত্যুবাচ স তং বৈশ্যঃ প্রশ্রয়াবনতো নৃপম্ || ১৯||
বৈশ্য উবাচ || ২০||
সমাধির্নাম বৈশ্যোঽহমুৎপন্নো ধনিনাং কুলে || ২১||
পুত্রদারৈর্নিরস্তশ্চ ধনলোভাদসাধুভিঃ |
বিহীনশ্চ ধনৈর্দারৈঃ পুত্রৈরাদায় মে ধনম্ || ২২||
বনমভ্যাগতো দুঃখী নিরস্তশ্চাপ্তবন্ধুভিঃ |
সোঽহং ন বেদ্মি পুত্রাণাং কুশলাকুশলাত্মিকাম্ || ২৩||
প্রবৃত্তিং স্বজনানাং চ দারাণাং চাত্র সংস্থিতঃ |
কিং নু তেষাং গৃহে ক্ষেমমক্ষেমং কিং নু সাম্প্রতম্ || ২৪||
কথং তে কিং নু সদ্বৃত্তা দুর্বৃত্তাঃ কিং নু মে সুতাঃ || ২৫||
রাজোবাচ || ২৬||
যৈর্নিরস্তো ভবাঁল্লুব্ধৈঃ পুত্রদারাদিভির্ধনৈঃ || ২৭||
তেষু কিং ভবতঃ স্নেহমনুবধ্নাতি মানসম্ || ২৮||
বৈশ্য উবাচ || ২৯||
এবমেতদ্যথা প্রাহ ভবানস্মদ্গতং বচঃ || ৩০||
কিং করোমি ন বধ্নাতি মম নিষ্ঠুরতাং মনঃ |
যৈঃ সংত্যজ্য পিতৃস্নেহং ধনলুব্ধৈর্নিরাকৃতঃ || ৩১||
পতিস্বজনহার্দং চ হার্দিতেষ্বেব মে মনঃ |
কিমেতন্নাভিজানামি জানন্নপি মহামতে || ৩২||
যৎপ্রেমপ্রবণং চিত্তং বিগুণেষ্বপি বন্ধুষু |
তেষাং কৃতে মে নিঃশ্বাসো দৌর্মনস্যং চ জায়তে || ৩৩||
করোমি কিং যন্ন মনস্তেষ্বপ্রীতিষু নিষ্ঠুরম্ || ৩৪||
মার্কণ্ডেয় উবাচ || ৩৫||
ততস্তৌ সহিতৌ বিপ্র তং মুনিং সমুপস্থিতৌ || ৩৬||
সমাধির্নাম বৈশ্যোঽসৌ স চ পার্থিবসত্তমঃ |
কৃৎবা তু তৌ যথান্যায়ং যথার্হং তেন সংবিদম্ || ৩৭||
উপবিষ্টৌ কথাঃ কাশ্চিচ্চক্রতুর্বৈশ্যপার্থিবৌ || ৩৮||
রাজোবাচ || ৩৯||
ভগবংস্ত্বামহং প্রষ্টুমিচ্ছাম্যেকং বদস্ব তৎ || ৪০||
দুঃখায় যন্মে মনসঃ স্বচিত্তায়ত্ততাং বিনা |
মমৎবং গতরাজ্যস্য রাজ্যাঙ্গেষ্বখিলেষ্বপি || ৪১||
জানতোঽপি যথাজ্ঞস্য কিমেতন্মুনিসত্তম |
অয়ং চ নিকৃতঃ পুত্রৈর্দারৈর্ভৃত্যৈস্তথোজ্ঝিতঃ || ৪২||
স্বজনেন চ সংত্যক্তস্তেষু হার্দী তথাপ্যতি |
এবমেষ তথাহং চ দ্বাবপ্যত্যন্তদুঃখিতৌ || ৪৩||
দৃষ্টদোষেঽপি বিষয়ে মমৎবাকৃষ্টমানসৌ |
তৎকিমেতন্মহাভাগ যন্মোহো জ্ঞানিনোরপি || ৪৪||
মমাস্য চ ভবত্যেষা বিবেকান্ধস্য মূঢতা || ৪৫||
ঋষিরুবাচ || ৪৬||
জ্ঞানমস্তি সমস্তস্য জন্তোর্বিষয়গোচরে || ৪৭||
বিষয়াশ্চ মহাভাগ যান্তি চৈবং পৃথক্পৃথক্ |
দিবান্ধাঃ প্রাণিনঃ কেচিদ্রাত্রাবন্ধাস্তথাপরে || ৪৮||
কেচিদ্দিবা তথা রাত্রৌ প্রাণিনস্তুল্যদৃষ্টয়ঃ |
জ্ঞানিনো মনুজাঃ সত্যং কিং তু তে ন হি কেবলম্ || ৪৯||
যতো হি জ্ঞানিনঃ সর্বে পশুপক্ষিমৃগাদয়ঃ |
জ্ঞানং চ তন্মনুষ্যাণাং যত্তেষাং মৃগপক্ষিণাম্ || ৫০||
মনুষ্যাণাং চ যত্তেষাং তুল্যমন্যত্তথোভয়োঃ |
জ্ঞানেঽপি সতি পশ্যৈতান্ পতঙ্গাঞ্ছাবচঞ্চুষু || ৫১||
কণমোক্ষাদৃতান্ মোহাৎপীড্যমানানপি ক্ষুধা |
মানুষা মনুজব্যাঘ্র সাভিলাষাঃ সুতান্ প্রতি || ৫২||
লোভাৎ প্রত্যুপকারায় নন্বেতান্ কিং ন পশ্যসি |
তথাপি মমতাবর্ত্তে মোহগর্তে নিপাতিতাঃ || ৫৩||
মহামায়াপ্রভাবেণ সংসারস্থিতিকারিণা |
তন্নাত্র বিস্ময়ঃ কার্যো যোগনিদ্রা জগৎপতেঃ || ৫৪||
মহামায়া হরেশ্চৈষা তয়া সম্মোহ্যতে জগৎ
জ্ঞানিনামপি চেতাংসি দেবী ভগবতী হি সা || ৫৫||
বলাদাকৃষ্য মোহায় মহামায়া প্রয়চ্ছতি |
তয়া বিসৃজ্যতে বিশ্বং জগদেতচ্চরাচরম্ || ৫৬||
সৈষা প্রসন্না বরদা নৃণাং ভবতি মুক্তয়ে |
সা বিদ্যা পরমা মুক্তের্হেতুভূতা সনাতনী || ৫৭||
সংসারবন্ধহেতুশ্চ সৈব সর্বেশ্বরেশ্বরী || ৫৮||
রাজোবাচ || ৫৯||
ভগবন্ কা হি সা দেবী মহামায়েতি যাং ভবান্ || ৬০||
ব্রবীতি কথমুৎপন্না সা কর্মাস্যাশ্চ কিং দ্বিজ |
যৎপ্রভাবা চ সা দেবী যৎস্বরূপা যদুদ্ভবা || ৬১||
তৎসর্বং শ্রোতুমিচ্ছামি ৎবত্তো ব্রহ্মবিদাং বর || ৬২||
ঋষিরুবাচ || ৬৩||
নিত্যৈব সা জগন্মূর্তিস্তয়া সর্বমিদং ততম্ || ৬৪||
তথাপি তৎসমুৎপত্তির্বহুধা শ্রূয়তাং মম |
দেবানাং কার্যসিদ্ধ্যর্থমাবির্ভবতি সা যদা || ৬৫||
উৎপন্নেতি তদা লোকে সা নিত্যাপ্যভিধীয়তে |
যোগনিদ্রাং যদা বিষ্ণুর্জগত্যেকার্ণবীকৃতে || ৬৫||
আস্তীর্য শেষমভজৎ কল্পান্তে ভগবান্ প্রভুঃ |
তদা দ্বাবসুরৌ ঘোরৌ বিখ্যাতৌ মধুকৈটভৌ || ৬৭||
বিষ্ণুকর্ণমলোদ্ভূতৌ হন্তুং ব্রহ্মাণমুদ্যতৌ |
স নাভিকমলে বিষ্ণোঃ স্থিতো ব্রহ্মা প্রজাপতিঃ || ৬৮||
দৃষ্ট্বা তাবসুরৌ চোগ্রৌ প্রসুপ্তং চ জনার্দনম্ |
তুষ্টাব যোগনিদ্রাং তামেকাগ্রহৃদয়ঃ স্থিতঃ || ৬৯||
বিবোধনার্থায় হরের্হরিনেত্রকৃতালয়াম্ |
বিশ্বেশ্বরীং জগদ্ধাত্রীং স্থিতিসংহারকারিণীম্ || ৭০||
নিদ্রাং ভগবতীং বিষ্ণোরতুলাং তেজসঃ প্রভুঃ || ৭১||
ব্রহ্মোবাচ || ৭২||
ৎবং স্বাহা ৎবং স্বধা ৎবং হি বষট্কারঃ স্বরাত্মিকা || ৭৩||
সুধা ৎবমক্ষরে নিত্যে ত্রিধা মাত্রাত্মিকা স্থিতা |
অর্ধমাত্রা স্থিতা নিত্যা যানুচ্চার্যাবিশেষতঃ || ৭৪||
ৎবমেব সংধ্যা সাবিত্রী ৎবং দেবি জননী পরা |
ৎবয়ৈতদ্ধার্যতে বিশ্বং ৎবয়ৈতৎ সৃজ্যতে জগৎ || ৭৫||
ৎবয়ৈতৎ পাল্যতে দেবি ৎবমৎস্যন্তে চ সর্বদা |
বিসৃষ্টৌ সৃষ্টিরূপা ৎবং স্থিতিরূপা চ পালনে || ৭৬||
তথা সংহৃতিরূপান্তে জগতোঽস্য জগন্ময়ে |
মহাবিদ্যা মহামায়া মহামেধা মহাস্মৃতিঃ || ৭৭||
মহামোহা চ ভবতী মহাদেবী মহেশ্বরী |
প্রকৃতিস্ত্বং চ সর্বস্য গুণত্রয়বিভাবিনী || ৭৮||
কালরাত্রির্মহারাত্রির্মোহরাত্রিশ্চ দারুণা |
ৎবং শ্রীস্ত্বমীশ্বরী ৎবং হ্রীস্ত্বং বুদ্ধির্বোধলক্ষণা || ৭৯||
লজ্জা পুষ্টিস্তথা তুষ্টিস্ত্বং শান্তিঃ ক্ষান্তিরেব চ |
খড্গিনী শূলিনী ঘোরা গদিনী চক্রিণী তথা || ৮০||
শঙ্খিনী চাপিনী বাণভুশুণ্ডীপরিঘায়ুধা |
সৌম্যা সৌম্যতরাশেষসৌম্যেভ্যস্ত্বতিসুন্দরী || ৮১||
পরাপরাণাং পরমা ৎবমেব পরমেশ্বরী |
যচ্চ কিংচিৎক্বচিদ্বস্তু সদসদ্বাখিলাত্মিকে || ৮২||
তস্য সর্বস্য যা শক্তিঃ সা ৎবং কিং স্তূয়সে ময়া |
যয়া ৎবয়া জগৎস্রষ্টা জগৎপাত্যত্তি যো জগৎ || ৮৩||
সোঽপি নিদ্রাবশং নীতঃ কস্ত্বাং স্তোতুমিহেশ্বরঃ |
বিষ্ণুঃ শরীরগ্রহণমহমীশান এব চ || ৮৪||
কারিতাস্তে যতোঽতস্ত্বাং কঃ স্তোতুং শক্তিমান্ ভবেৎ |
সা ৎবমিত্থং প্রভাবৈঃ স্বৈরুদারৈর্দেবি সংস্তুতা || ৮৫||
মোহয়ৈতৌ দুরাধর্ষাবসুরৌ মধুকৈটভৌ |
প্রবোধং চ জগৎস্বামী নীয়তামচ্যুতো লঘু || ৮৬||
বোধশ্চ ক্রিয়তামস্য হন্তুমেতৌ মহাসুরৌ || ৮৭||
ঋষিরুবাচ || ৮৮||
এবং স্তুতা তদা দেবী তামসী তত্র বেধসা || ৮৯||
বিষ্ণোঃ প্রবোধনার্থায় নিহন্তুং মধুকৈটভৌ |
নেত্রাস্যনাসিকাবাহুহৃদয়েভ্যস্তথোরসঃ || ৯০||
নির্গম্য দর্শনে তস্থৌ ব্রহ্মণোঽব্যক্তজন্মনঃ |
উত্তস্থৌ চ জগন্নাথস্তয়া মুক্তো জনার্দনঃ || ৯১||
একার্ণবেঽহিশয়নাত্ততঃ স দদৃশে চ তৌ |
মধুকৈটভৌ দুরাত্মানাবতিবীর্যপরাক্রমৌ || ৯২||
ক্রোধরক্তেক্ষণাবত্তুং ব্রহ্মাণং জনিতোদ্যমৌ |
সমুত্থায় ততস্তাভ্যাং যুয়ুধে ভগবান্ হরিঃ || ৯৩||
পঞ্চবর্ষসহস্রাণি বাহুপ্রহরণো বিভুঃ |
তাবপ্যতিবলোন্মত্তৌ মহামায়াবিমোহিতৌ || ৯৪||
উক্তবন্তৌ বরোঽস্মত্তো ব্রিয়তামিতি কেশবম্ || ৯৫||
শ্রীভগবানুবাচ || ৯৬||
ভবেতামদ্য মে তুষ্টৌ মম বধ্যাবুভাবপি || ৯৭||
কিমন্যেন বরেণাত্র এতাবদ্ধি বৃতং ময়া || ৯৮||
ঋষিরুবাচ || ৯৯||
বঞ্চিতাভ্যামিতি তদা সর্বমাপোময়ং জগৎ || ১০০||
বিলোক্য তাভ্যাং গদিতো ভগবান্ কমলেক্ষণঃ |
আবাং জহি ন যত্রোর্বী সলিলেন পরিপ্লুতা || ১০১||
ঋষিরুবাচ || ১০২||
তথেত্যুক্ত্বা ভগবতা শঙ্খচক্রগদাভৃতা |
কৃৎবা চক্রেণ বৈ ছিন্নে জঘনে শিরসী তয়োঃ || ১০৩||
এবমেষা সমুৎপন্না ব্রহ্মণা সংস্তুতা স্বয়ম্ |
প্রভাবমস্যা দেব্যাস্তু ভূয়ঃ শৃণু বদামি তে || ১০৪||
| ঐং ওঁ |
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
মধুকৈটভবধো নাম প্রথমোঽধ্যায়ঃ || ১||
________________________________________
|| দ্বিতীয়োঽধ্যায়ঃ ||
বিনিয়োগঃ
অস্য শ্রী মধ্যমচরিত্রস্য বিষ্ণুরৃষিঃ |
শ্রীমহালক্ষ্মীর্দেবতা |
উষ্ণিক্ ছন্দঃ | শাকম্ভরী শক্তিঃ | দুর্গা বীজম্ |
বায়ুস্তত্ত্বম্ |
যজুর্বেদঃ স্বরূপম্ | শ্রীমহালক্ষ্মীপ্রীত্যর্থে
মধ্যমচরিত্রজপে বিনিয়োগঃ |
| ধ্যানম্ |
ওঁ অক্ষস্রক্পরশূ গদেষুকুলিশং পদ্মং ধনুঃ কুণ্ডিকাং
দণ্ডং শক্তিমসিং চ চর্ম জলজং ঘণ্টাং সুরাভাজনম্ |
শূলং পাশসুদর্শনে চ দধতীং হস্তৈঃ প্রবালপ্রভাং
সেবে সৈরিভমর্দিনীমিহ মহালক্ষ্মীং সরোজস্থিতাম্ ||
ওঁ হ্রীং ঋষিরুবাচ || ১||
দেবাসুরমভূদ্যুদ্ধং পূর্ণমব্দশতং পুরা |
মহিষেঽসুরাণামধিপে দেবানাং চ পুরন্দরে || ২||
তত্রাসুরৈর্মহাবীর্যৈর্দেবসৈন্যং পরাজিতম্ |
জিৎবা চ সকলান্ দেবানিন্দ্রোঽভূন্মহিষাসুরঃ || ৩||
ততঃ পরাজিতা দেবাঃ পদ্ময়োনিং প্রজাপতিম্ |
পুরস্কৃত্য গতাস্তত্র যত্রেশগরুডধ্বজৌ || ৪||
যথাবৃত্তং তয়োস্তদ্বন্মহিষাসুরচেষ্টিতম্ |
ত্রিদশাঃ কথয়ামাসুর্দেবাভিভববিস্তরম্ || ৫||
সূর্যেন্দ্রাগ্ন্যনিলেন্দূনাং যমস্য বরুণস্য চ |
অন্যেষাং চাধিকারান্স স্বয়মেবাধিতিষ্ঠতি || ৬||
স্বর্গান্নিরাকৃতাঃ সর্বে তেন দেবগণা ভুবি |
বিচরন্তি যথা মর্ত্যা মহিষেণ দুরাত্মনা || ৭||
এতদ্বঃ কথিতং সর্বমমরারিবিচেষ্টিতম্ |
শরণং বঃ প্রপন্নাঃ স্মো বধস্তস্য বিচিন্ত্যতাম্ || ৮||
ইত্থং নিশম্য দেবানাং বচাংসি মধুসূদনঃ |
চকার কোপং শম্ভুশ্চ ভ্রুকুটীকুটিলাননৌ || ৯||
ততোঽতিকোপপূর্ণস্য চক্রিণো বদনাত্ততঃ |
নিশ্চক্রাম মহত্তেজো ব্রহ্মণঃ শঙ্করস্য চ || ১০||
অন্যেষাং চৈব দেবানাং শক্রাদীনাং শরীরতঃ |
নির্গতং সুমহত্তেজস্তচ্চৈক্যং সমগচ্ছত || ১১||
অতীব তেজসঃ কূটং জ্বলন্তমিব পর্বতম্ |
দদৃশুস্তে সুরাস্তত্র জ্বালাব্যাপ্তদিগন্তরম্ || ১২||
অতুলং তত্র তত্তেজঃ সর্বদেবশরীরজম্ |
একস্থং তদভূন্নারী ব্যাপ্তলোকত্রয়ং ৎবিষা || ১৩||
যদভূচ্ছাম্ভবং তেজস্তেনাজায়ত তন্মুখম্ |
যাম্যেন চাভবন্ কেশা বাহবো বিষ্ণুতেজসা || ১৪||
সৌম্যেন স্তনয়োর্যুগ্মং মধ্যং চৈন্দ্রেণ চাভবৎ |
বারুণেন চ জঙ্ঘোরূ নিতম্বস্তেজসা ভুবঃ || ১৫||
ব্রহ্মণস্তেজসা পাদৌ তদঙ্গুল্যোঽর্কতেজসা |
বসূনাং চ করাঙ্গুল্যঃ কৌবেরেণ চ নাসিকা || ১৬||
তস্যাস্তু দন্তাঃ সম্ভূতাঃ প্রাজাপত্যেন তেজসা |
নয়নত্রিতয়ং জজ্ঞে তথা পাবকতেজসা || ১৭||
ভ্রুবৌ চ সংধ্যয়োস্তেজঃ শ্রবণাবনিলস্য চ |
অন্যেষাং চৈব দেবানাং সম্ভবস্তেজসাং শিবা || ১৮||
ততঃ সমস্তদেবানাং তেজোরাশিসমুদ্ভবাম্ |
তাং বিলোক্য মুদং প্রাপুরমরা মহিষার্দিতাঃ |
ততো দেবা দদুস্তস্যৈ স্বানি স্বান্যায়ুধানি চ || ১৯||
শূলং শূলাদ্বিনিষ্কৃষ্য দদৌ তস্যৈ পিনাকধৃক্ |
চক্রং চ দত্তবান্ কৃষ্ণঃ সমুৎপাট্য স্বচক্রতঃ || ২০||
শঙ্খং চ বরুণঃ শক্তিং দদৌ তস্যৈ হুতাশনঃ |
মারুতো দত্তবাংশ্চাপং বাণপূর্ণে তথেষুধী || ২১||
বজ্রমিন্দ্রঃ সমুৎপাট্য কুলিশাদমরাধিপঃ |
দদৌ তস্যৈ সহস্রাক্ষো ঘণ্টামৈরাবতাদ্গজাৎ || ২২||
কালদণ্ডাদ্যমো দণ্ডং পাশং চাম্বুপতির্দদৌ |
প্রজাপতিশ্চাক্ষমালাং দদৌ ব্রহ্মা কমণ্ডলুম্ || ২৩||
সমস্তরোমকূপেষু নিজরশ্মীন্ দিবাকরঃ |
কালশ্চ দত্তবান্ খড্গং তস্যৈ চর্ম চ নির্মলম্ || ২৪||
ক্ষীরোদশ্চামলং হারমজরে চ তথাম্বরে |
চূডামণিং তথা দিব্যং কুণ্ডলে কটকানি চ || ২৫||
অর্ধচন্দ্রং তথা শুভ্রং কেয়ূরান্ সর্ববাহুষু |
নূপুরৌ বিমলৌ তদ্বদ্ গ্রৈবেয়কমনুত্তমম্ || ২৬||
অঙ্গুলীয়করত্নানি সমস্তাস্বঙ্গুলীষু চ |
বিশ্বকর্মা দদৌ তস্যৈ পরশুং চাতিনির্মলম্ || ২৭||
অস্ত্রাণ্যনেকরূপাণি তথাভেদ্যং চ দংশনম্ |
অম্লানপঙ্কজাং মালাং শিরস্যুরসি চাপরাম্ || ২৮||
অদদজ্জলধিস্তস্যৈ পঙ্কজং চাতিশোভনম্ |
হিমবান্ বাহনং সিংহং রত্নানি বিবিধানি চ || ২৯||
দদাবশূন্যং সুরয়া পানপাত্রং ধনাধিপঃ |
শেষশ্চ সর্বনাগেশো মহামণিবিভূষিতম্ || ৩০||
নাগহারং দদৌ তস্যৈ ধত্তে যঃ পৃথিবীমিমাম্ |
অন্যৈরপি সুরৈর্দেবী ভূষণৈরায়ুধৈস্তথা || ৩১||
সম্মানিতা ননাদোচ্চৈঃ সাট্টহাসং মুহুর্মুহুঃ |
তস্যা নাদেন ঘোরেণ কৃৎস্নমাপূরিতং নভঃ || ৩২||
অমায়তাতিমহতা প্রতিশব্দো মহানভূৎ |
চুক্ষুভুঃ সকলা লোকাঃ সমুদ্রাশ্চ চকম্পিরে || ৩৩||
চচাল বসুধা চেলুঃ সকলাশ্চ মহীধরাঃ |
জয়েতি দেবাশ্চ মুদা তামূচুঃ সিংহবাহিনীম্ || ৩৪||
তুষ্টুবুর্মুনয়শ্চৈনাং ভক্তিনম্রাত্মমূর্তয়ঃ |
দৃষ্ট্বা সমস্তং সংক্ষুব্ধং ত্রৈলোক্যমমরারয়ঃ || ৩৫||
সন্নদ্ধাখিলসৈন্যাস্তে সমুত্তস্থুরুদায়ুধাঃ |
আঃ কিমেতদিতি ক্রোধাদাভাষ্য মহিষাসুরঃ || ৩৬||
অভ্যধাবত তং শব্দমশেষৈরসুরৈর্বৃতঃ |
স দদর্শ ততো দেবীং ব্যাপ্তলোকত্রয়াং ৎবিষা || ৩৭||
পাদাক্রান্ত্যা নতভুবং কিরীটোল্লিখিতাম্বরাম্ |
ক্ষোভিতাশেষপাতালাং ধনুর্জ্যানিঃস্বনেন তাম্ || ৩৮||
দিশো ভুজসহস্রেণ সমন্তাদ্ব্যাপ্য সংস্থিতাম্ |
ততঃ প্রববৃতে যুদ্ধং তয়া দেব্যা সুরদ্বিষাম্ || ৩৯||
শস্ত্রাস্ত্রৈর্বহুধা মুক্তৈরাদীপিতদিগন্তরম্ |
মহিষাসুরসেনানীশ্চিক্ষুরাখ্যো মহাসুরঃ || ৪০||
যুয়ুধে চামরশ্চান্যৈশ্চতুরঙ্গবলান্বিতঃ |
রথানাময়ুতৈঃ ষড্ভিরুদগ্রাখ্যো মহাসুরঃ || ৪১||
অয়ুধ্যতায়ুতানাং চ সহস্রেণ মহাহনুঃ |
পঞ্চাশদ্ভিশ্চ নিয়ুতৈরসিলোমা মহাসুরঃ || ৪২||
অয়ুতানাং শতৈঃ ষড্ভির্বাষ্কলো যুয়ুধে রণে |
গজবাজিসহস্রৌঘৈরনেকৈঃ পরিবারিতঃ || ৪৩||
বৃতো রথানাং কোট্যা চ যুদ্ধে তস্মিন্নয়ুধ্যত |
বিডালাখ্যোঽযুতানাং চ পঞ্চাশদ্ভিরথায়ুতৈঃ || ৪৪||
যুয়ুধে সংযুগে তত্র রথানাং পরিবারিতঃ |
অন্যে চ তত্রায়ুতশো রথনাগহয়ৈর্বৃতাঃ || ৪৫||
যুয়ুধুঃ সংযুগে দেব্যা সহ তত্র মহাসুরাঃ |
কোটিকোটিসহস্রৈস্তু রথানাং দন্তিনাং তথা || ৪৬||
হয়ানাং চ বৃতো যুদ্ধে তত্রাভূন্মহিষাসুরঃ |
তোমরৈর্ভিন্দিপালৈশ্চ শক্তিভির্মুসলৈস্তথা || ৪৭||
যুয়ুধুঃ সংযুগে দেব্যা খড্গৈঃ পরশুপট্টিশৈঃ |
কেচিচ্চ চিক্ষিপুঃ শক্তীঃ কেচিৎ পাশাংস্তথাপরে || ৪৮||
দেবীং খড্গপ্রহারৈস্তু তে তাং হন্তুং প্রচক্রমুঃ |
সাপি দেবী ততস্তানি শস্ত্রাণ্যস্ত্রাণি চণ্ডিকা || ৪৯||
লীলয়ৈব প্রচিচ্ছেদ নিজশস্ত্রাস্ত্রবর্ষিণী |
অনায়স্তাননা দেবী স্তূয়মানা সুরর্ষিভিঃ || ৫০||
মুমোচাসুরদেহেষু শস্ত্রাণ্যস্ত্রাণি চেশ্বরী |
সোঽপি ক্রুদ্ধো ধুতসটো দেব্যা বাহনকেসরী || ৫১||
চচারাসুরসৈন্যেষু বনেষ্বিব হুতাশনঃ |
নিঃশ্বাসান্ মুমুচে যাংশ্চ যুধ্যমানা রণেঽম্বিকা || ৫২||
ত এব সদ্যঃ সম্ভূতা গণাঃ শতসহস্রশঃ |
যুয়ুধুস্তে পরশুভির্ভিন্দিপালাসিপট্টিশৈঃ || ৫৩||
নাশয়ন্তোঽসুরগণান্ দেবীশক্ত্যুপবৃংহিতাঃ |
অবাদয়ন্ত পটহান্ গণাঃ শঙ্খাংস্তথাপরে || ৫৪||
মৃদঙ্গাংশ্চ তথৈবান্যে তস্মিন্ যুদ্ধমহোৎসবে |
ততো দেবী ত্রিশূলেন গদয়া শক্তিবৃষ্টিভিঃ || ৫৫||
খড্গাদিভিশ্চ শতশো নিজঘান মহাসুরান্ |
পাতয়ামাস চৈবান্যান্ ঘণ্টাস্বনবিমোহিতান্ || ৫৬||
অসুরান্ ভুবি পাশেন বদ্ধ্বা চান্যানকর্ষয়ৎ |
কেচিদ্ দ্বিধাকৃতাস্তীক্ষ্ণৈঃ খড্গপাতৈস্তথাপরে || ৫৭||
বিপোথিতা নিপাতেন গদয়া ভুবি শেরতে |
বেমুশ্চ কেচিদ্রুধিরং মুসলেন ভৃশং হতাঃ || ৫৮||
কেচিন্নিপতিতা ভূমৌ ভিন্নাঃ শূলেন বক্ষসি |
নিরন্তরাঃ শরৌঘেণ কৃতাঃ কেচিদ্রণাজিরে || ৫৯||
শ্যেনানুকারিণঃ প্রাণান্ মুমুচুস্ত্রিদশার্দনাঃ |
কেষাংচিদ্ বাহবশ্ছিন্নাশ্ছিন্নগ্রীবাস্তথাপরে || ৬০||
শিরাংসি পেতুরন্যেষামন্যে মধ্যে বিদারিতাঃ |
বিচ্ছিন্নজঙ্ঘাস্ত্বপরে পেতুরুর্ব্যাং মহাসুরাঃ || ৬১||
একবাহ্বক্ষিচরণাঃ কেচিদ্দেব্যা দ্বিধাকৃতাঃ |
ছিন্নেঽপি চান্যে শিরসি পতিতাঃ পুনরুত্থিতাঃ || ৬২||
কবন্ধা যুয়ুধুর্দেব্যা গৃহীতপরমায়ুধাঃ |
ননৃতুশ্চাপরে তত্র যুদ্ধে তূর্যলয়াশ্রিতাঃ || ৬৩||
কবন্ধাশ্ছিন্নশিরসঃ খড্গশক্ত্যৃষ্টিপাণয়ঃ |
তিষ্ঠ তিষ্ঠেতি ভাষন্তো দেবীমন্যে মহাসুরাঃ || ৬৪||
পাতিতৈ রথনাগাশ্বৈরসুরৈশ্চ বসুন্ধরা |
অগম্যা সাভবত্তত্র যত্রাভূৎ স মহারণঃ || ৬৫||
শোণিতৌঘা মহানদ্যঃ সদ্যস্তত্র প্রসুস্রুবুঃ |
মধ্যে চাসুরসৈন্যস্য বারণাসুরবাজিনাম্ || ৬৬||
ক্ষণেন তন্মহাসৈন্যমসুরাণাং তথাম্বিকা |
নিন্যে ক্ষয়ং যথা বহ্নিস্তৃণদারুমহাচয়ম্ || ৬৭||
স চ সিংহো মহানাদমুৎসৃজন্ ধুতকেসরঃ |
শরীরেভ্যোঽমরারীণামসূনিব বিচিন্বতি || ৬৮||
দেব্যা গণৈশ্চ তৈস্তত্র কৃতং যুদ্ধং তথাসুরৈঃ |
যথৈষাং তুতুষুর্দেবাঃ পুষ্পবৃষ্টিমুচো দিবি || ৬৯||
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
মহিষাসুরসৈন্যবধো নাম দ্বিতীয়োঽধ্যায়ঃ || ২||
________________________________________
|| তৃতীয়োঽধ্যায়ঃ ||
ওঁ ঋষিরুবাচ || ১||
নিহন্যমানং তৎসৈন্যমবলোক্য মহাসুরঃ |
সেনানীশ্চিক্ষুরঃ কোপাদ্যয়ৌ যোদ্ধুমথাম্বিকাম্ || ২||
স দেবীং শরবর্ষেণ ববর্ষ সমরেঽসুরঃ |
যথা মেরুগিরেঃ শৃঙ্গং তোয়বর্ষেণ তোয়দঃ || ৩||
তস্য ছিৎবা ততো দেবী লীলয়ৈব শরোৎকরান্ |
জঘান তুরগান্বাণৈর্যন্তারং চৈব বাজিনাম্ || ৪||
চিচ্ছেদ চ ধনুঃ সদ্যো ধ্বজং চাতিসমুচ্ছৃতম্ |
বিব্যাধ চৈব গাত্রেষু ছিন্নধন্বানমাশুগৈঃ || ৫||
সচ্ছিন্নধন্বা বিরথো হতাশ্বো হতসারথিঃ |
অভ্যধাবত তাং দেবীং খড্গচর্মধরোঽসুরঃ || ৬||
সিংহমাহত্য খড্গেন তীক্ষ্ণধারেণ মূর্ধনি |
আজঘান ভুজে সব্যে দেবীমপ্যতিবেগবান্ || ৭||
তস্যাঃ খড্গো ভুজং প্রাপ্য পফাল নৃপনন্দন |
ততো জগ্রাহ শূলং স কোপাদরুণলোচনঃ || ৮||
চিক্ষেপ চ ততস্তত্তু ভদ্রকাল্যাং মহাসুরঃ |
জাজ্বল্যমানং তেজোভী রবিবিম্বমিবাম্বরাৎ || ৯||
দৃষ্ট্বা তদাপতচ্ছূলং দেবী শূলমমুঞ্চত |
তেন তচ্ছতধা নীতং শূলং স চ মহাসুরঃ || ১০||
হতে তস্মিন্মহাবীর্যে মহিষস্য চমূপতৌ |
আজগাম গজারূঢশ্চামরস্ত্রিদশার্দনঃ || ১১||
সোঽপি শক্তিং মুমোচাথ দেব্যাস্তামম্বিকা দ্রুতম্ |
হুংকারাভিহতাং ভূমৌ পাতয়ামাস নিষ্প্রভাম্ || ১২||
ভগ্নাং শক্তিং নিপতিতাং দৃষ্ট্বা ক্রোধসমন্বিতঃ |
চিক্ষেপ চামরঃ শূলং বাণৈস্তদপি সাচ্ছিনৎ || ১৩||
ততঃ সিংহঃ সমুৎপত্য গজকুম্ভান্তরে স্থিতঃ |
বাহুয়ুদ্ধেন যুয়ুধে তেনোচ্চৈস্ত্রিদশারিণা || ১৪||
যুধ্যমানৌ ততস্তৌ তু তস্মান্নাগান্মহীং গতৌ |
যুয়ুধাতেঽতিসংরব্ধৌ প্রহারৈরতিদারুণৈঃ || ১৫||
ততো বেগাৎ খমুৎপত্য নিপত্য চ মৃগারিণা |
করপ্রহারেণ শিরশ্চামরস্য পৃথক্ কৃতম্ || ১৬||
উদগ্রশ্চ রণে দেব্যা শিলাবৃক্ষাদিভির্হতঃ |
দন্তমুষ্টিতলৈশ্চৈব করালশ্চ নিপাতিতঃ || ১৭||
দেবী ক্রুদ্ধা গদাপাতৈশ্চূর্ণয়ামাস চোদ্ধতম্ |
বাষ্কলং ভিন্দিপালেন বাণৈস্তাম্রং তথান্ধকম্ || ১৮||
উগ্রাস্যমুগ্রবীর্যং চ তথৈব চ মহাহনুম্ |
ত্রিনেত্রা চ ত্রিশূলেন জঘান পরমেশ্বরী || ১৯||
বিডালস্যাসিনা কায়াৎ পাতয়ামাস বৈ শিরঃ |
দুর্ধরং দুর্মুখং চোভৌ শরৈর্নিন্যে যমক্ষয়ম্ || ২০||
এবং সংক্ষীয়মাণে তু স্বসৈন্যে মহিষাসুরঃ |
মাহিষেণ স্বরূপেণ ত্রাসয়ামাস তান্ গণান্ || ২১||
কাংশ্চিত্তুণ্ডপ্রহারেণ খুরক্ষেপৈস্তথাপরান্ |
লাঙ্গূলতাডিতাংশ্চান্যান্ শৃঙ্গাভ্যাং চ বিদারিতান্ || ২২||
বেগেন কাংশ্চিদপরান্নাদেন ভ্রমণেন চ |
নিঃশ্বাসপবনেনান্যান্পাতয়ামাস ভূতলে || ২৩||
নিপাত্য প্রমথানীকমভ্যধাবত সোঽসুরঃ |
সিংহং হন্তুং মহাদেব্যাঃ কোপং চক্রে ততোঽম্বিকা || ২৪||
সোঽপি কোপান্মহাবীর্যঃ খুরক্ষুণ্ণমহীতলঃ |
শৃঙ্গাভ্যাং পর্বতানুচ্চাংশ্চিক্ষেপ চ ননাদ চ || ২৫||
বেগভ্রমণবিক্ষুণ্ণা মহী তস্য ব্যশীর্যত |
লাঙ্গূলেনাহতশ্চাব্ধিঃ প্লাবয়ামাস সর্বতঃ || ২৬||
ধুতশৃঙ্গবিভিন্নাশ্চ খণ্ডং খণ্ডং যয়ুর্ঘনাঃ |
শ্বাসানিলাস্তাঃ শতশো নিপেতুর্নভসোঽচলাঃ || ২৭||
ইতি ক্রোধসমাধ্মাতমাপতন্তং মহাসুরম্ |
দৃষ্ট্বা সা চণ্ডিকা কোপং তদ্বধায় তদাকরোৎ || ২৮||
সা ক্ষিপ্ত্বা তস্য বৈ পাশং তং ববন্ধ মহাসুরম্ |
তত্যাজ মাহিষং রূপং সোঽপি বদ্ধো মহামৃধে || ২৯||
ততঃ সিংহোঽভবৎসদ্যো যাবত্তস্যাম্বিকা শিরঃ |
ছিনত্তি তাবৎ পুরুষঃ খড্গপাণিরদৃশ্যত || ৩০||
তত এবাশু পুরুষং দেবী চিচ্ছেদ সায়কৈঃ |
তং খড্গচর্মণা সার্ধং ততঃ সোঽভূন্মহাগজঃ || ৩১||
করেণ চ মহাসিংহং তং চকর্ষ জগর্জ চ |
কর্ষতস্তু করং দেবী খড্গেন নিরকৃন্তত || ৩২||
ততো মহাসুরো ভূয়ো মাহিষং বপুরাস্থিতঃ |
তথৈব ক্ষোভয়ামাস ত্রৈলোক্যং সচরাচরম্ || ৩৩||
ততঃ ক্রুদ্ধা জগন্মাতা চণ্ডিকা পানমুত্তমম্ |
পপৌ পুনঃ পুনশ্চৈব জহাসারুণলোচনা || ৩৪||
ননর্দ চাসুরঃ সোঽপি বলবীর্যমদোদ্ধতঃ |
বিষাণাভ্যাং চ চিক্ষেপ চণ্ডিকাং প্রতি ভূধরান্ || ৩৫||
সা চ তান্প্রহিতাংস্তেন চূর্ণয়ন্তী শরোৎকরৈঃ |
উবাচ তং মদোদ্ধূতমুখরাগাকুলাক্ষরম্ || ৩৬||
দেব্যুবাচ || ৩৭||
গর্জ গর্জ ক্ষণং মূঢ মধু যাবৎপিবাম্যহম্ |
ময়া ৎবয়ি হতেঽত্রৈব গর্জিষ্যন্ত্যাশু দেবতাঃ || ৩৮||
ঋষিরুবাচ || ৩৯||
এবমুক্ত্বা সমুৎপত্য সারূঢা তং মহাসুরম্ |
পাদেনাক্রম্য কণ্ঠে চ শূলেনৈনমতাডয়ৎ || ৪০||
ততঃ সোঽপি পদাক্রান্তস্তয়া নিজমুখাত্তদা |
অর্ধনিষ্ক্রান্ত এবাসীদ্দেব্যা বীর্যেণ সংবৃতঃ || ৪১||
অর্ধনিষ্ক্রান্ত এবাসৌ যুধ্যমানো মহাসুরঃ |
তয়া মহাসিনা দেব্যা শিরশ্ছিত্ত্বা নিপাতিতঃ || ৪২||
ততো হাহাকৃতং সর্বং দৈত্যসৈন্যং ননাশ তৎ |
প্রহর্ষং চ পরং জগ্মুঃ সকলা দেবতাগণাঃ || ৪৩||
তুষ্টুবুস্তাং সুরা দেবীং সহদিব্যৈর্মহর্ষিভিঃ |
জগুর্গন্ধর্বপতয়ো ননৃতুশ্চাপ্সরোগণাঃ || ৪৪||
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
মহিষাসুরবধো নাম তৃতীয়োঽধ্যায়ঃ || ৩||
________________________________________
|| চতুর্থোঽধ্যায়ঃ ||
ওঁ ঋষিরুবাচ || ১||
শক্রাদয়ঃ সুরগণা নিহতেঽতিবীর্যে
তস্মিন্দুরাত্মনি সুরারিবলে চ দেব্যা |
তাং তুষ্টুবুঃ প্রণতিনম্রশিরোধরাংসা
বাগ্ভিঃ প্রহর্ষপুলকোদ্গমচারুদেহাঃ || ২||
দেব্যা যয়া ততমিদং জগদাত্মশক্ত্যা
নিঃশেষদেবগণশক্তিসমূহমূর্ত্যা |
তামম্বিকামখিলদেবমহর্ষিপূজ্যাং
ভক্ত্যা নতাঃ স্ম বিদধাতু শুভানি সা নঃ || ৩||
যস্যাঃ প্রভাবমতুলং ভগবাননন্তো
ব্রহ্মা হরশ্চ ন হি বক্তুমলং বলং চ |
সা চণ্ডিকাখিলজগৎপরিপালনায়
নাশায় চাশুভভয়স্য মতিং করোতু || ৪||
যা শ্রীঃ স্বয়ং সুকৃতিনাং ভবনেষ্বলক্ষ্মীঃ
পাপাত্মনাং কৃতধিয়াং হৃদয়েষু বুদ্ধিঃ |
শ্রদ্ধা সতাং কুলজনপ্রভবস্য লজ্জা
তাং ৎবাং নতাঃ স্ম পরিপালয় দেবি বিশ্বম্ || ৫||
কিং বর্ণয়াম তব রূপমচিন্ত্যমেতৎ
কিংচাতিবীর্যমসুরক্ষয়কারি ভূরি |
কিং চাহবেষু চরিতানি তবাতি যানি
সর্বেষু দেব্যসুরদেবগণাদিকেষু || ৬||
হেতুঃ সমস্তজগতাং ত্রিগুণাপি দোষৈ-
র্ন জ্ঞায়সে হরিহরাদিভিরপ্যপারা |
সর্বাশ্রয়াখিলমিদং জগদংশভূত-
মব্যাকৃতা হি পরমা প্রকৃতিস্ত্বমাদ্যা || ৭||
যস্যাঃ সমস্তসুরতা সমুদীরণেন
তৃপ্তিং প্রয়াতি সকলেষু মখেষু দেবি |
স্বাহাসি বৈ পিতৃগণস্য চ তৃপ্তিহেতু-
রুচ্চার্যসে ৎবমত এব জনৈঃ স্বধা চ || ৮||
যা মুক্তিহেতুরবিচিন্ত্যমহাব্রতা ৎবং
অভ্যস্যসে সুনিয়তেন্দ্রিয়তত্ত্বসারৈঃ |
মোক্ষার্থিভির্মুনিভিরস্তসমস্তদোষৈ-
র্বিদ্যাসি সা ভগবতী পরমা হি দেবি || ৯||
শব্দাত্মিকা সুবিমল{গ্য}র্জুষাং নিধান-
মুদ্গীথরম্যপদপাঠবতাং চ সাম্নাম্ |
দেবি ত্রয়ী ভগবতী ভবভাবনায়
বার্তাসি সর্বজগতাং পরমা{তি}র্হন্ত্রী || ১০||
মেধাসি দেবি বিদিতাখিলশাস্ত্রসারা
দুর্গাসি দুর্গভবসাগরনৌরসঙ্গা |
শ্রীঃ কৈটভারিহৃদয়ৈককৃতাধিবাসা
গৌরী ৎবমেব শশিমৌলিকৃতপ্রতিষ্ঠা || ১১||
ঈষৎসহাসমমলং পরিপূর্ণচন্দ্র-
বিম্বানুকারি কনকোত্তমকান্তিকান্তম্ |
অত্যদ্ভুতং প্রহৃতমাত্তরুষা তথাপি
বক্ত্রং বিলোক্য সহসা মহিষাসুরেণ || ১২||
দৃষ্ট্বা তু দেবি কুপিতং ভ্রুকুটীকরাল-
মুদ্যচ্ছশাঙ্কসদৃশচ্ছবি যন্ন সদ্যঃ |
প্রাণান্ মুমোচ মহিষস্তদতীব চিত্রং
কৈর্জীব্যতে হি কুপিতান্তকদর্শনেন || ১৩||
দেবি প্রসীদ পরমা ভবতী ভবায়
সদ্যো বিনাশয়সি কোপবতী কুলানি |
বিজ্ঞাতমেতদধুনৈব যদস্তমেত-
ন্নীতং বলং সুবিপুলং মহিষাসুরস্য || ১৪||
তে সম্মতা জনপদেষু ধনানি তেষাং
তেষাং যশাংসি ন চ সীদতি বন্ধুবর্গঃ |
ধন্যাস্ত এব নিভৃতাত্মজভৃত্যদারা
যেষাং সদাভ্যুদয়দা ভবতী প্রসন্না || ১৫||
ধ{ম্যা}র্ণি দেবি সকলানি সদৈব কর্মা-
ণ্যত্যাদৃতঃ প্রতিদিনং সুকৃতী করোতি |
স্বর্গং প্রয়াতি চ ততো ভবতী প্রসাদা-
ল্লোকত্রয়েঽপি ফলদা ননু দেবি তেন || ১৬||
দুর্গে স্মৃতা হরসি ভীতিমশেষজন্তোঃ
স্বস্থৈঃ স্মৃতা মতিমতীব শুভাং দদাসি |
দারিদ্রদুঃখভয়হারিণি কা ৎবদন্যা
সর্বোপকারকরণায় সদা{দ্র}র্চিত্তা || ১৭||
এভির্হতৈর্জগদুপৈতি সুখং তথৈতে
কুর্বন্তু নাম নরকায় চিরায় পাপম্ |
সংগ্রামমৃত্যুমধিগম্য দিবং প্রয়ান্তু
মৎবেতি নূনমহিতান্বিনিহংসি দেবি || ১৮||
দৃষ্ট্বৈব কিং ন ভবতী প্রকরোতি ভস্ম
সর্বাসুরানরিষু যৎপ্রহিণোষি শস্ত্রম্ |
লোকান্প্রয়ান্তু রিপবোঽপি হি শস্ত্রপূতা
ইত্থং মতির্ভবতি তেষ্বহিতেষুসাধ্বী || ১৯||
খড্গপ্রভানিকরবিস্ফুরণৈস্তথোগ্রৈঃ
শূলাগ্রকান্তিনিবহেন দৃশোঽসুরাণাম্ |
যন্নাগতা বিলয়মংশুমদিন্দুখণ্ড-
যোগ্যাননং তব বিলোকয়তাং তদেতৎ || ২০||
দুর্বৃত্তবৃত্তশমনং তব দেবি শীলং
রূপং তথৈতদবিচিন্ত্যমতুল্যমন্যৈঃ |
বীর্যং চ হন্তৃ হৃতদেবপরাক্রমাণাং
বৈরিষ্বপি প্রকটিতৈব দয়া ৎবয়েত্থম্ || ২১||
কেনোপমা ভবতু তেঽস্য পরাক্রমস্য
রূপং চ শত্রুভয়কার্যতিহারি কুত্র |
চিত্তে কৃপা সমরনিষ্ঠুরতা চ দৃষ্টা
ৎবয়্যেব দেবি বরদে ভুবনত্রয়েঽপি || ২২||
ত্রৈলোক্যমেতদখিলং রিপুনাশনেন
ত্রাতং ৎবয়া সমরমূর্ধনি তেঽপি হৎবা |
নীতা দিবং রিপুগণা ভয়মপ্যপাস্তম্
অস্মাকমুন্মদসুরারিভবং নমস্তে || ২৩||
শূলেন পাহি নো দেবি পাহি খড্গেন চাম্বিকে |
ঘণ্টাস্বনেন নঃ পাহি চাপজ্যানিঃস্বনেন চ || ২৪||
প্রাচ্যাং রক্ষ প্রতীচ্যাং চ চণ্ডিকে রক্ষ দক্ষিণে |
ভ্রামণেনাত্মশূলস্য উত্তরস্যাং তথেশ্বরি || ২৫||
সৌম্যানি যানি রূপাণি ত্রৈলোক্যে বিচরন্তি তে |
যানি চাত্যন্তঘোরাণি তৈ রক্ষাস্মাংস্তথা ভুবম্ || ২৬||
খড্গশূলগদাদীনি যানি চাস্ত্রানি তেঽম্বিকে |
করপল্লবসঙ্গীনি তৈরস্মান্রক্ষ সর্বতঃ || ২৭||
ঋষিরুবাচ || ২৮||
এবং স্তুতা সুরৈর্দিব্যৈঃ কুসুমৈর্নন্দনোদ্ভবৈঃ |
অর্চিতা জগতাং ধাত্রী তথা গন্ধানুলেপনৈঃ || ২৯||
ভক্ত্যা সমস্তৈস্ত্রিদশৈর্দিব্যৈর্ধূপৈঃ সুধূপিতা |
প্রাহ প্রসাদসুমুখী সমস্তান্ প্রণতান্ সুরান্ || ৩০||
দেব্যুবাচ || ৩১||
ব্রিয়তাং ত্রিদশাঃ সর্বে যদস্মত্তোঽভিবাঞ্ছিতম্ || ৩২||
দেবা ঊচুঃ || ৩৩||
ভগবত্যা কৃতং সর্বং ন কিংচিদবশিষ্যতে || ৩৪||
যদয়ং নিহতঃ শত্রুরস্মাকং মহিষাসুরঃ |
যদি চাপি বরো দেয়স্ত্বয়াস্মাকং মহেশ্বরি || ৩৫||
সংস্মৃতা সংস্মৃতা ৎবং নো হিংসেথাঃ পরমাপদঃ |
যশ্চ ম{ত্য}র্ঃ স্তবৈরেভিস্ত্বাং স্তোষ্যত্যমলাননে || ৩৬||
তস্য বিত্ত{দ্ধি}র্বিভবৈর্ধনদারাদিসম্পদাম্ |
বৃদ্ধয়েঽস্মৎপ্রসন্না ৎবং ভবেথাঃ সর্বদাম্বিকে || ৩৭||
ঋষিরুবাচ || ৩৮||
ইতি প্রসাদিতা দেবৈর্জগতোঽর্থে তথাত্মনঃ |
তথেত্যুক্ত্বা ভদ্রকালী বভূবান্তর্হিতা নৃপ || ৩৯||
ইত্যেতৎকথিতং ভূপ সম্ভূতা সা যথা পুরা |
দেবী দেবশরীরেভ্যো জগত্ত্রয়হিতৈষিণী || ৪০||
পুনশ্চ গৌরীদেহাৎসা সমুদ্ভূতা যথাভবৎ |
বধায় দুষ্টদৈত্যানাং তথা শুম্ভনিশুম্ভয়োঃ || ৪১||
রক্ষণায় চ লোকানাং দেবানামুপকারিণী |
তচ্ছৃণুষ্ব ময়াখ্যাতং যথাবৎকথয়ামি তে || ৪২||
| হ্রীং ওঁ |
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে
দেবীমাহাত্ম্যে
শক্রাদিস্তুতির্নাম চতুর্থোঽধ্যায়ঃ || ৪||
________________________________________
|| পঞ্চমোঽধ্যায়ঃ ||
বিনিয়োগঃ
অস্য শ্রী উত্তরচরিত্রস্য রুদ্র ঋষিঃ |
শ্রীমহাসরস্বতী দেবতা |
অনুষ্টুপ্ ছন্দঃ | ভীমা শক্তিঃ | ভ্রামরী বীজম্ |
সূর্যস্তত্ত্বম্ |
সামবেদঃ স্বরূপম্ | শ্রীমহাসরস্বতীপ্রীত্যর্থে
উত্তরচরিত্রপাঠে
বিনিয়োগঃ |
ধ্যানম্
ঘণ্টাশূলহলানি শঙ্খমুসলে চক্রং ধনুঃ সায়কং
হস্তাব্জৈর্দধতীং ঘনান্তবিলসচ্ছীতাংশুতুল্যপ্রভাম্ |
গৌরীদেহসমুদ্ভবাং ত্রিজগতামাধারভূতাং মহা-
পূর্বামত্র সরস্বতীমনুভজে শুম্ভাদিদৈত্যার্দিনীম্ ||
ওঁ ক্লীং ঋষিরুবাচ || ১||
পুরা শুম্ভনিশুম্ভাভ্যামসুরাভ্যাং শচীপতেঃ |
ত্রৈলোক্যং যজ্ঞভাগাশ্চ হৃতা মদবলাশ্রয়াৎ || ২||
তাবেব সূর্যতাং তদ্বদধিকারং তথৈন্দবম্ |
কৌবেরমথ যাম্যং চ চক্রাতে বরুণস্য চ || ৩||
তাবেব পবনর্দ্ধিং চ চক্রতুর্বহ্নিকর্ম চ |
ততো দেবা বিনির্ধূতা ভ্রষ্টরাজ্যাঃ পরাজিতাঃ || ৪||
হৃতাধিকারাস্ত্রিদশাস্তাভ্যাং সর্বে নিরাকৃতাঃ |
মহাসুরাভ্যাং তাং দেবীং সংস্মরন্ত্যপরাজিতাম্ || ৫||
তয়াস্মাকং বরো দত্তো যথাপৎসু স্মৃতাখিলাঃ |
ভবতাং নাশয়িষ্যামি তৎক্ষণাৎপরমাপদঃ || ৬||
ইতি কৃৎবা মতিং দেবা হিমবন্তং নগেশ্বরম্ |
জগ্মুস্তত্র ততো দেবীং বিষ্ণুমায়াং প্রতুষ্টুবুঃ || ৭||
দেবা ঊচুঃ || ৮||
নমো দেব্যৈ মহাদেব্যৈ শিবায়ৈ সততং নমঃ |
নমঃ প্রকৃত্যৈ ভদ্রায়ৈ নিয়তাঃ প্রণতাঃ স্ম তাম্ || ৯||
রৌদ্রায়ৈ নমো নিত্যায়ৈ গৌর্যৈ ধাত্র্যৈ নমো নমঃ |
জ্যোৎস্নায়ৈ চেন্দুরূপিণ্যৈ সুখায়ৈ সততং নমঃ || ১০||
কল্যাণ্যৈ প্রণতা বৃদ্ধ্যৈ সিদ্ধ্যৈ কুর্মো নমো নমঃ |
নৈরৃত্যৈ ভূভৃতাং লক্ষ্ম্যৈ শর্বাণ্যৈ তে নমো নমঃ || ১১||
দুর্গায়ৈ দুর্গপারায়ৈ সারায়ৈ সর্বকারিণ্যৈ |
খ্যাত্যৈ তথৈব কৃষ্ণায়ৈ ধূম্রায়ৈ সততং নমঃ || ১২||
অতিসৌম্যাতিরৌদ্রায়ৈ নতাস্তস্যৈ নমো নমঃ |
নমো জগৎপ্রতিষ্ঠায়ৈ দেব্যৈ কৃত্যৈ নমো নমঃ || ১৩||
যা দেবী সর্বভূতেষু বিষ্ণুমায়েতি শব্দিতা |
নমস্তস্যৈ নমস্তস্যৈ নমস্তস্যৈ নমো নমঃ || ১৪-১৬||
যা দেবী সর্বভূতেষু চেতনেত্যভিধীয়তে |
নমস্তস্যৈ নমস্তস্যৈ নমস্তস্যৈ নমো নমঃ || ১৭-১৯||
যা দেবী সর্বভূতেষু বুদ্ধিরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ২০-২২||
যা দেবী সর্বভূতেষু নিদ্রারূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ২৩-২৫||
যা দেবী সর্বভূতেষু ক্ষুধারূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ২৬-২৮||
যা দেবী সর্বভূতেষু ছায়ারূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ২৯-৩১||
যা দেবী সর্বভূতেষু শক্তিরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৩২-৩৪||
যা দেবী সর্বভূতেষু তৃষ্ণারূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৩৫-৩৭||
যা দেবী সর্বভূতেষু ক্ষান্তিরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৩৮-৪০||
যা দেবী সর্বভূতেষু জাতিরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৪১-৪৩||
যা দেবী সর্বভূতেষু লজ্জারূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৪৪-৪৬||
যা দেবী সর্বভূতেষু শান্তিরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৪৭-৪৯||
যা দেবী সর্বভূতেষু শ্রদ্ধারূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৫০-৫২||
যা দেবী সর্বভূতেষু কান্তিরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৫৩-৫৫||
যা দেবী সর্বভূতেষু লক্ষ্মীরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৫৬-৫৮||
যা দেবী সর্বভূতেষু বৃত্তিরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৫৯-৬১||
যা দেবী সর্বভূতেষু স্মৃতিরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৬২-৬৪||
যা দেবী সর্বভূতেষু দয়ারূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৬৫-৬৭||
যা দেবী সর্বভূতেষু তুষ্টিরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৬৮-৭০||
যা দেবী সর্বভূতেষু মাতৃরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৭১-৭৩||
যা দেবী সর্বভূতেষু ভ্রান্তিরূপেণ সংস্থিতা |
নমস্তস্যৈ নমস্তস্যৈ নমস্তস্যৈ নমো নমঃ || ৭৪-৭৬||
ইন্দ্রিয়াণামধিষ্ঠাত্রী ভূতানাং চাখিলেষু যা |
ভূতেষু সততং তস্যৈ ব্যাপ্ত্যৈ দেব্যৈ নমো নমঃ || ৭৭||
চিতিরূপেণ যা কৃৎস্নমেতদ্ ব্যাপ্য স্থিতা জগৎ |
নমস্তস্যৈ নমস্তস্যৈ নমস্তস্যৈ নমো নমঃ || ৭৮-৮০||
স্তুতা সুরৈঃ পূর্বমভীষ্টসংশ্রয়া-
ত্তথা সুরেন্দ্রেণ দিনেষু সেবিতা |
করোতু সা নঃ শুভহেতুরীশ্বরী
শুভানি ভদ্রাণ্যভিহন্তু চাপদঃ || ৮১||
যা সাম্প্রতং চোদ্ধতদৈত্যতাপিতৈ-
রস্মাভিরীশা চ সুরৈর্নমস্যতে |
যা চ স্মৃতা তৎক্ষণমেব হন্তি নঃ
সর্বাপদো ভক্তিবিনম্রমূর্তিভিঃ || ৮২||
ঋষিরুবাচ || ৮৩||
এবং স্তবাভিয়ুক্তানাং দেবানাং তত্র পার্বতী |
স্নাতুমভ্যায়য়ৌ তোয়ে জাহ্নব্যা নৃপনন্দন || ৮৪||
সাব্রবীত্তান্ সুরান্ সুভ্রূর্ভবদ্ভিঃ স্তূয়তেঽত্র কা |
শরীরকোশতশ্চাস্যাঃ সমুদ্ভূতাব্রবীচ্ছিবা || ৮৫||
স্তোত্রং মমৈতৎক্রিয়তে শুম্ভদৈত্যনিরাকৃতৈঃ |
দেবৈঃ সমেতৈঃ সমরে নিশুম্ভেন পরাজিতৈঃ || ৮৬||
শরীরকোশাদ্যত্তস্যাঃ পার্বত্যা নিঃসৃতাম্বিকা |
কৌশিকীতি সমস্তেষু ততো লোকেষু গীয়তে || ৮৭||
তস্যাং বিনির্গতায়াং তু কৃষ্ণাভূৎসাপি পার্বতী |
কালিকেতি সমাখ্যাতা হিমাচলকৃতাশ্রয়া || ৮৮||
ততোঽম্বিকাং পরং রূপং বিভ্রাণাং সুমনোহরম্ |
দদর্শ চণ্ডো মুণ্ডশ্চ ভৃত্যৌ শুম্ভনিশুম্ভয়োঃ || ৮৯||
তাভ্যাং শুম্ভায় চাখ্যাতা সাতীব সুমনোহরা |
কাপ্যাস্তে স্ত্রী মহারাজ ভাসয়ন্তী হিমাচলম্ || ৯০||
নৈব তাদৃক্ ক্বচিদ্রূপং দৃষ্টং কেনচিদুত্তমম্ |
জ্ঞায়তাং কাপ্যসৌ দেবী গৃহ্যতাং চাসুরেশ্বর || ৯১||
স্ত্রীরত্নমতিচার্বঙ্গী দ্যোতয়ন্তী দিশস্ত্বিষা |
সা তু তিষ্ঠতি দৈত্যেন্দ্র তাং ভবান্ দ্রষ্টুমর্হতি || ৯২||
যানি রত্নানি মণয়ো গজাশ্বাদীনি বৈ প্রভো |
ত্রৈলোক্যে তু সমস্তানি সাম্প্রতং ভান্তি তে গৃহে || ৯৩||
ঐরাবতঃ সমানীতো গজরত্নং পুরন্দরাৎ |
পারিজাততরুশ্চায়ং তথৈবোচ্চৈঃশ্রবা হয়ঃ || ৯৪||
বিমানং হংসসংযুক্তমেতত্তিষ্ঠতি তেঽঙ্গণে |
রত্নভূতমিহানীতং যদাসীদ্বেধসোঽদ্ভুতম্ || ৯৫||
নিধিরেষ মহাপদ্মঃ সমানীতো ধনেশ্বরাৎ |
কিঞ্জল্কিনীং দদৌ চাব্ধির্মালামম্লানপঙ্কজাম্ || ৯৬||
ছত্রং তে বারুণং গেহে কাঞ্চনস্রাবি তিষ্ঠতি |
তথায়ং স্যন্দনবরো যঃ পুরাসীৎপ্রজাপতেঃ || ৯৭||
মৃত্যোরুৎক্রান্তিদা নাম শক্তিরীশ ৎবয়া হৃতা |
পাশঃ সলিলরাজস্য ভ্রাতুস্তব পরিগ্রহে || ৯৮||
নিশুম্ভস্যাব্ধিজাতাশ্চ সমস্তা রত্নজাতয়ঃ |
বহ্নিরপি দদৌ তুভ্যমগ্নিশৌচে চ বাসসী || ৯৯||
এবং দৈত্যেন্দ্র রত্নানি সমস্তান্যাহৃতানি তে |
স্ত্রীরত্নমেষা কল্যাণী ৎবয়া কস্মান্ন গৃহ্যতে || ১০০||
ঋষিরুবাচ || ১০১||
নিশম্যেতি বচঃ শুম্ভঃ স তদা চণ্ডমুণ্ডয়োঃ |
প্রেষয়ামাস সুগ্রীবং দূতং দেব্যা মহাসুরম্ || ১০২||
ইতি চেতি চ বক্তব্যা সা গৎবা বচনান্মম |
যথা চাভ্যেতি সম্প্রীত্যা তথা কার্যং ৎবয়া লঘু || ১০৩||
স তত্র গৎবা যত্রাস্তে শৈলোদ্দেশেঽতিশোভনে |
তাং চ দেবীং ততঃ প্রাহ শ্লক্ষ্ণং মধুরয়া গিরা || ১০৪||
দূত উবাচ || ১০৫||
দেবি দৈত্যেশ্বরঃ শুম্ভস্ত্রৈলোক্যে পরমেশ্বরঃ |
দূতোঽহং প্রেষিতস্তেন ৎবৎসকাশমিহাগতঃ || ১০৬||
অব্যাহতাজ্ঞঃ সর্বাসু যঃ সদা দেবয়োনিষু |
নির্জিতাখিলদৈত্যারিঃ স যদাহ শৃণুষ্ব তৎ || ১০৭||
মম ত্রৈলোক্যমখিলং মম দেবা বশানুগাঃ |
যজ্ঞভাগানহং সর্বানুপাশ্নামি পৃথক্ পৃথক্ || ১০৮||
ত্রৈলোক্যে বররত্নানি মম বশ্যান্যশেষতঃ |
তথৈব গজরত্নং চ হৃতং দেবেন্দ্রবাহনম্ || ১০৯||
ক্ষীরোদমথনোদ্ভূতমশ্বরত্নং মমামরৈঃ |
উচ্চৈঃশ্রবসসংজ্ঞং তৎপ্রণিপত্য সমর্পিতম্ || ১১০||
যানি চান্যানি দেবেষু গন্ধর্বেষূরগেষু চ |
রত্নভূতানি ভূতানি তানি ময়্যেব শোভনে || ১১১||
স্ত্রীরত্নভূতাং ৎবাং দেবি লোকে মন্যামহে বয়ম্ |
সা ৎবমস্মানুপাগচ্ছ যতো রত্নভুজো বয়ম্ || ১১২||
মাং বা মমানুজং বাপি নিশুম্ভমুরুবিক্রমম্ |
ভজ ৎবং চঞ্চলাপাঙ্গি রত্নভূতাসি বৈ যতঃ || ১১৩||
পরমৈশ্বর্যমতুলং প্রাপ্স্যসে মৎপরিগ্রহাৎ |
এতদ্বুদ্ধ্যা সমালোচ্য মৎপরিগ্রহতাং ব্রজ || ১১৪||
ঋষিরুবাচ || ১১৫||
ইত্যুক্তা সা তদা দেবী গম্ভীরান্তঃস্মিতা জগৌ |
দুর্গা ভগবতী ভদ্রা যয়েদং ধার্যতে জগৎ || ১১৬||
দেব্যুবাচ || ১১৭||
সত্যমুক্তং ৎবয়া নাত্র মিথ্যা কিংচিত্ত্বয়োদিতম্ |
ত্রৈলোক্যাধিপতিঃ শুম্ভো নিশুম্ভশ্চাপি তাদৃশঃ || ১১৮||
কিং ৎবত্র যৎপ্রতিজ্ঞাতং মিথ্যা তৎক্রিয়তে কথম্ |
শ্রূয়তামল্পবুদ্ধিৎবাৎপ্রতিজ্ঞা যা কৃতা পুরা || ১১৯||
যো মাং জয়তি সংগ্রামে যো মে দর্পং ব্যপোহতি |
যো মে প্রতিবলো লোকে স মে ভর্তা ভবিষ্যতি || ১২০||
তদাগচ্ছতু শুম্ভোঽত্র নিশুম্ভো বা মহাবলঃ |
মাং জিৎবা কিং চিরেণাত্র পাণিং গৃহ্ণাতু মে লঘু || ১২১||
দূত উবাচ || ১২২||
অবলিপ্তাসি মৈবং ৎবং দেবি ব্রূহি মমাগ্রতঃ |
ত্রৈলোক্যে কঃ পুমাংস্তিষ্ঠেদগ্রে শুম্ভনিশুম্ভয়োঃ || ১২৩||
অন্যেষামপি দৈত্যানাং সর্বে দেবা ন বৈ যুধি |
তিষ্ঠন্তি সম্মুখে দেবি কিং পুনঃ স্ত্রী ৎবমেকিকা || ১২৪||
ইন্দ্রাদ্যাঃ সকলা দেবাস্তস্থুর্যেষাং ন সংযুগে |
শুম্ভাদীনাং কথং তেষাং স্ত্রী প্রয়াস্যসি সম্মুখম্ || ১২৫||
সা ৎবং গচ্ছ ময়ৈবোক্তা পার্শ্বং শুম্ভনিশুম্ভয়োঃ |
কেশাকর্ষণনির্ধূতগৌরবা মা গমিষ্যসি || ১২৬||
দেব্যুবাচ || ১২৭||
এবমেতদ্ বলী শুম্ভো নিশুম্ভশ্চাপিতাদৃশঃ |
কিং করোমি প্রতিজ্ঞা মে যদনালোচিতা পুরা || ১২৮||
স ৎবং গচ্ছ ময়োক্তং তে যদেতৎসর্বমাদৃতঃ |
তদাচক্ষ্বাসুরেন্দ্রায় স চ যুক্তং করোতু যৎ || ১২৯||
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
দেব্যা দূতসংবাদো নাম পঞ্চমোঽধ্যায়ঃ || ৫||
________________________________________
|| ষষ্ঠোঽধ্যায়ঃ ||
ওঁ ঋষিরুবাচ || ১||
ইত্যাকর্ণ্য বচো দেব্যাঃ স দূতোঽমর্ষপূরিতঃ |
সমাচষ্ট সমাগম্য দৈত্যরাজায় বিস্তরাৎ || ২||
তস্য দূতস্য তদ্বাক্যমাকর্ণ্যাসুররাট্ ততঃ |
সক্রোধঃ প্রাহ দৈত্যানামধিপং ধূম্রলোচনম্ || ৩||
হে ধূম্রলোচনাশু ৎবং স্বসৈন্যপরিবারিতঃ |
তামানয় বলাদ্দুষ্টাং কেশাকর্ষণবিহ্বলাম্ || ৪||
তৎপরিত্রাণদঃ কশ্চিদ্যদি বোত্তিষ্ঠতেঽপরঃ |
স হন্তব্যোঽমরো বাপি যক্ষো গন্ধর্ব এব বা || ৫||
ঋষিরুবাচ || ৬||
তেনাজ্ঞপ্তস্ততঃ শীঘ্রং স দৈত্যো ধূম্রলোচনঃ |
বৃতঃ ষষ্ট্যা সহস্রাণামসুরাণাং দ্রুতং যয়ৌ || ৭||
স দৃষ্ট্বা তাং ততো দেবীং তুহিনাচলসংস্থিতাম্ |
জগাদোচ্চৈঃ প্রয়াহীতি মূলং শুম্ভনিশুম্ভয়োঃ || ৮||
ন চেৎপ্রীত্যাদ্য ভবতী মদ্ভর্তারমুপৈষ্যতি |
ততো বলান্নয়াম্যেষ কেশাকর্ষণবিহ্বলাম্ || ৯||
দেব্যুবাচ || ১০||
দৈত্যেশ্বরেণ প্রহিতো বলবান্বলসংবৃতঃ |
বলান্নয়সি মামেবং ততঃ কিং তে করোম্যহম্ || ১১||
ঋষিরুবাচ || ১২||
ইত্যুক্তঃ সোঽভ্যধাবত্তামসুরো ধূম্রলোচনঃ |
হুংকারেণৈব তং ভস্ম সা চকারাম্বিকা তদা || ১৩||
অথ ক্রুদ্ধং মহাসৈন্যমসুরাণাং তথাম্বিকা |
ববর্ষ সায়কৈস্তীক্ষ্ণৈস্তথা শক্তিপরশ্বধৈঃ || ১৪||
ততো ধুতসটঃ কোপাৎকৃৎবা নাদং সুভৈরবম্ |
পপাতাসুরসেনায়াং সিংহো দেব্যাঃ স্ববাহনঃ || ১৫||
কাংশ্চিৎকরপ্রহারেণ দৈত্যানাস্যেন চাপরান্ |
আক্রান্ত্যা চাধরেণান্যান্ জঘান স মহাসুরান্ || ১৬||
কেষাংচিৎপাটয়ামাস নখৈঃ কোষ্ঠানি কেসরী |
তথা তলপ্রহারেণ শিরাংসি কৃতবান্পৃথক্ || ১৭||
বিচ্ছিন্নবাহুশিরসঃ কৃতাস্তেন তথাপরে |
পপৌ চ রুধিরং কোষ্ঠাদন্যেষাং ধুতকেসরঃ || ১৮||
ক্ষণেন তদ্বলং সর্বং ক্ষয়ং নীতং মহাত্মনা |
তেন কেসরিণা দেব্যা বাহনেনাতিকোপিনা || ১৯||
শ্রুৎবা তমসুরং দেব্যা নিহতং ধূম্রলোচনম্ |
বলং চ ক্ষয়িতং কৃৎস্নং দেবীকেসরিণা ততঃ || ২০||
চুকোপ দৈত্যাধিপতিঃ শুম্ভঃ প্রস্ফুরিতাধরঃ |
আজ্ঞাপয়ামাস চ তৌ চণ্ডমুণ্ডৌ মহাসুরৌ || ২১||
হে চণ্ড হে মুণ্ড বলৈর্বহুভিঃ পরিবারিতৌ |
তত্র গচ্ছত গৎবা চ সা সমানীয়তাং লঘু || ২২||
কেশেষ্বাকৃষ্য বদ্ধ্বা বা যদি বঃ সংশয়ো যুধি |
তদাশেষায়ুধৈঃ সর্বৈরসুরৈর্বিনিহন্যতাম্ || ২৩||
তস্যাং হতায়াং দুষ্টায়াং সিংহে চ বিনিপাতিতে |
শীঘ্রমাগম্যতাং বদ্ধ্বা গৃহীৎবা তামথাম্বিকাম্ || ২৪||
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
শুম্ভনিশুম্ভসেনানীধূম্রলোচনবধো নাম ষষ্ঠোঽধ্যায়ঃ || ৬||
________________________________________
|| সপ্তমোঽধ্যায়ঃ ||
ওঁ ঋষিরুবাচ || ১||
আজ্ঞপ্তাস্তে ততো দৈত্যাশ্চণ্ডমুণ্ডপুরোগমাঃ |
চতুরঙ্গবলোপেতা যয়ুরভ্যুদ্যতায়ুধাঃ || ২||
দদৃশুস্তে ততো দেবীমীষদ্ধাসাং ব্যবস্থিতাম্ |
সিংহস্যোপরি শৈলেন্দ্রশৃঙ্গে মহতি কাঞ্চনে || ৩||
তে দৃষ্ট্বা তাং সমাদাতুমুদ্যমং চক্রুরুদ্যতাঃ |
আকৃষ্টচাপাসিধরাস্তথান্যে তৎসমীপগাঃ || ৪||
ততঃ কোপং চকারোচ্চৈরম্বিকা তানরীন্প্রতি |
কোপেন চাস্যা বদনং মষীবর্ণমভূত্তদা || ৫||
ভ্রুকুটীকুটিলাত্তস্যা ললাটফলকাদ্দ্রুতম্ |
কালী করালবদনা বিনিষ্ক্রান্তাসিপাশিনী || ৬||
বিচিত্রখট্বাঙ্গধরা নরমালাবিভূষণা |
দ্বীপিচর্মপরীধানা শুষ্কমাংসাতিভৈরবা || ৭||
অতিবিস্তারবদনা জিহ্বাললনভীষণা |
নিমগ্নারক্তনয়না নাদাপূরিতদিঙ্মুখা || ৮||
সা বেগেনাভিপতিতা ঘাতয়ন্তী মহাসুরান্ |
সৈন্যে তত্র সুরারীণামভক্ষয়ত তদ্বলম্ || ৯||
পার্ষ্ণিগ্রাহাঙ্কুশগ্রাহয়োধঘণ্টাসমন্বিতান্ |
সমাদায়ৈকহস্তেন মুখে চিক্ষেপ বারণান্ || ১০||
তথৈব যোধং তুরগৈ রথং সারথিনা সহ |
নিক্ষিপ্য বক্ত্রে দশনৈশ্চর্বয়ন্ত্যতিভৈরবম্ || ১১||
একং জগ্রাহ কেশেষু গ্রীবায়ামথ চাপরম্ |
পাদেনাক্রম্য চৈবান্যমুরসান্যমপোথয়ৎ || ১২||
তৈর্মুক্তানি চ শস্ত্রাণি মহাস্ত্রাণি তথাসুরৈঃ |
মুখেন জগ্রাহ রুষা দশনৈর্মথিতান্যপি || ১৩||
বলিনাং তদ্বলং সর্বমসুরাণাং দুরাত্মনাম্ |
মমর্দাভক্ষয়চ্চান্যানন্যাংশ্চাতাডয়ত্তদা || ১৪||
অসিনা নিহতাঃ কেচিৎকেচিৎখট্বাঙ্গতাডিতাঃ |
জগ্মুর্বিনাশমসুরা দন্তাগ্রাভিহতাস্তথা || ১৫||
ক্ষণেন তদ্বলং সর্বমসুরাণাং নিপাতিতম্ |
দৃষ্ট্বা চণ্ডোঽভিদুদ্রাব তাং কালীমতিভীষণাম্ || ১৬||
শরবর্ষৈর্মহাভীমৈর্ভীমাক্ষীং তাং মহাসুরঃ |
ছাদয়ামাস চক্রৈশ্চ মুণ্ডঃ ক্ষিপ্তৈঃ সহস্রশঃ || ১৭||
তানি চক্রাণ্যনেকানি বিশমানানি তন্মুখম্ |
বভুর্যথার্কবিম্বানি সুবহূনি ঘনোদরম্ || ১৮||
ততো জহাসাতিরুষা ভীমং ভৈরবনাদিনী |
কালী করালবদনা দুর্দর্শদশনোজ্জ্বলা || ১৯||
উত্থায় চ মহাসিংহং দেবী চণ্ডমধাবত |
গৃহীৎবা চাস্য কেশেষু শিরস্তেনাসিনাচ্ছিনৎ || ২০||
অথ মুণ্ডোঽভ্যধাবত্তাং দৃষ্ট্বা চণ্ডং নিপাতিতম্ |
তমপ্যপাতয়দ্ভূমৌ সা খড্গাভিহতং রুষা || ২১||
হতশেষং ততঃ সৈন্যং দৃষ্ট্বা চণ্ডং নিপাতিতম্ |
মুণ্ডং চ সুমহাবীর্যং দিশো ভেজে ভয়াতুরম্ || ২২||
শিরশ্চণ্ডস্য কালী চ গৃহীৎবা মুণ্ডমেব চ |
প্রাহ প্রচণ্ডাট্টহাসমিশ্রমভ্যেত্য চণ্ডিকাম্ || ২৩||
ময়া তবাত্রোপহৃতৌ চণ্ডমুণ্ডৌ মহাপশূ |
যুদ্ধয়জ্ঞে স্বয়ং শুম্ভং নিশুম্ভং চ হনিষ্যসি || ২৪||
ঋষিরুবাচ || ২৫||
তাবানীতৌ ততো দৃষ্ট্বা চণ্ডমুণ্ডৌ মহাসুরৌ |
উবাচ কালীং কল্যাণী ললিতং চণ্ডিকা বচঃ || ২৬||
যস্মাচ্চণ্ডং চ মুণ্ডং চ গৃহীৎবা ৎবমুপাগতা |
চামুণ্ডেতি ততো লোকে খ্যাতা দেবী ভবিষ্যসি || ২৭||
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
চণ্ডমুণ্ডবধো নাম সপ্তমোঽধ্যায়ঃ || ৭||
________________________________________
|| অষ্টমোঽধ্যায়ঃ ||
ওঁ ঋষিরুবাচ || ১||
চণ্ডে চ নিহতে দৈত্যে মুণ্ডে চ বিনিপাতিতে |
বহুলেষু চ সৈন্যেষু ক্ষয়িতেষ্বসুরেশ্বরঃ || ২||
ততঃ কোপপরাধীনচেতাঃ শুম্ভঃ প্রতাপবান্ |
উদ্যোগং সর্বসৈন্যানাং দৈত্যানামাদিদেশ হ || ৩||
অদ্য সর্ববলৈর্দৈত্যাঃ ষডশীতিরুদায়ুধাঃ |
কম্বূনাং চতুরশীতির্নির্যান্তু স্ববলৈর্বৃতাঃ || ৪||
কোটিবীর্যাণি পঞ্চাশদসুরাণাং কুলানি বৈ |
শতং কুলানি ধৌম্রাণাং নির্গচ্ছন্তু মমাজ্ঞয়া || ৫||
কালকা দৌর্হৃদা মৌর্বাঃ কালিকেয়াস্তথাসুরাঃ |
যুদ্ধায় সজ্জা নির্যান্তু আজ্ঞয়া ৎবরিতা মম || ৬||
ইত্যাজ্ঞাপ্যাসুরপতিঃ শুম্ভো ভৈরবশাসনঃ |
নির্জগাম মহাসৈন্যসহস্রৈর্বহুভির্বৃতঃ || ৭||
আয়ান্তং চণ্ডিকা দৃষ্ট্বা তৎসৈন্যমতিভীষণম্ |
জ্যাস্বনৈঃ পূরয়ামাস ধরণীগগনান্তরম্ || ৮||
ততঃ সিংহো মহানাদমতীব কৃতবান্নৃপ |
ঘণ্টাস্বনেন তান্নাদানম্বিকা চোপবৃংহয়ৎ || ৯||
ধনুর্জ্যাসিংহঘণ্টানাং নাদাপূরিতদিঙ্মুখা |
নিনাদৈর্ভীষণৈঃ কালী জিগ্যে বিস্তারিতাননা || ১০||
তং নিনাদমুপশ্রুত্য দৈত্যসৈন্যৈশ্চতুর্দিশম্ |
দেবী সিংহস্তথা কালী সরোষৈঃ পরিবারিতাঃ || ১১||
এতস্মিন্নন্তরে ভূপ বিনাশায় সুরদ্বিষাম্ |
ভবায়ামরসিংহানামতিবীর্যবলান্বিতাঃ || ১২||
ব্রহ্মেশগুহবিষ্ণূনাং তথেন্দ্রস্য চ শক্তয়ঃ |
শরীরেভ্যো বিনিষ্ক্রম্য তদ্রূপৈশ্চণ্ডিকাং যয়ুঃ || ১৩||
যস্য দেবস্য যদ্রূপং যথা ভূষণবাহনম্ |
তদ্বদেব হি তচ্ছক্তিরসুরান্যোদ্ধুমায়য়ৌ || ১৪||
হংসয়ুক্তবিমানাগ্রে সাক্ষসূত্রকমণ্ডলুঃ |
আয়াতা ব্রহ্মণঃ শক্তির্ব্রহ্মাণীত্যভিধীয়তে || ১৫||
মাহেশ্বরী বৃষারূঢা ত্রিশূলবরধারিণী |
মহাহিবলয়া প্রাপ্তা চন্দ্ররেখাবিভূষণা || ১৬||
কৌমারী শক্তিহস্তা চ ময়ূরবরবাহনা |
যোদ্ধুমভ্যায়য়ৌ দৈত্যানম্বিকা গুহরূপিণী || ১৭||
তথৈব বৈষ্ণবী শক্তির্গরুডোপরি সংস্থিতা |
শঙ্খচক্রগদাশার্ঙ্গখড্গহস্তাভ্যুপায়য়ৌ || ১৮||
যজ্ঞবারাহমতুলং রূপং যা বিভ্রতো হরেঃ |
শক্তিঃ সাপ্যায়য়ৌ তত্র বারাহীং বিভ্রতী তনুম্ || ১৯||
নারসিংহী নৃসিংহস্য বিভ্রতী সদৃশং বপুঃ |
প্রাপ্তা তত্র সটাক্ষেপক্ষিপ্তনক্ষত্রসংহতিঃ || ২০||
বজ্রহস্তা তথৈবৈন্দ্রী গজরাজোপরি স্থিতা |
প্রাপ্তা সহস্রনয়না যথা শক্রস্তথৈব সা || ২১||
ততঃ পরিবৃতস্তাভিরীশানো দেবশক্তিভিঃ |
হন্যন্তামসুরাঃ শীঘ্রং মম প্রীত্যাহ চণ্ডিকাম্ || ২২||
ততো দেবীশরীরাত্তু বিনিষ্ক্রান্তাতিভীষণা |
চণ্ডিকা শক্তিরত্যুগ্রা শিবাশতনিনাদিনী || ২৩||
সা চাহ ধূম্রজটিলমীশানমপরাজিতা |
দূত ৎবং গচ্ছ ভগবন্ পার্শ্বং শুম্ভনিশুম্ভয়োঃ || ২৪||
ব্রূহি শুম্ভং নিশুম্ভং চ দানবাবতিগর্বিতৌ |
যে চান্যে দানবাস্তত্র যুদ্ধায় সমুপস্থিতাঃ || ২৫||
ত্রৈলোক্যমিন্দ্রো লভতাং দেবাঃ সন্তু হবির্ভুজঃ |
যূয়ং প্রয়াত পাতালং যদি জীবিতুমিচ্ছথ || ২৬||
বলাবলেপাদথ চেদ্ভবন্তো যুদ্ধকাঙ্ক্ষিণঃ |
তদাগচ্ছত তৃপ্যন্তু মচ্ছিবাঃ পিশিতেন বঃ || ২৭||
যতো নিয়ুক্তো দৌত্যেন তয়া দেব্যা শিবঃ স্বয়ম্ |
শিবদূতীতি লোকেঽস্মিংস্ততঃ সা খ্যাতিমাগতা || ২৮||
তেঽপি শ্রুৎবা বচো দেব্যাঃ শর্বাখ্যাতং মহাসুরাঃ |
অমর্ষাপূরিতা জগ্মুর্যত্র কাত্যায়নী স্থিতা || ২৯||
ততঃ প্রথমমেবাগ্রে শরশক্ত্যৃষ্টিবৃষ্টিভিঃ |
ববর্ষুরুদ্ধতামর্ষাস্তাং দেবীমমরারয়ঃ || ৩০||
সা চ তান্ প্রহিতান্ বাণাঞ্ছূলশক্তিপরশ্বধান্ |
চিচ্ছেদ লীলয়াধ্মাতধনুর্মুক্তৈর্মহেষুভিঃ || ৩১||
তস্যাগ্রতস্তথা কালী শূলপাতবিদারিতান্ |
খট্বাঙ্গপোথিতাংশ্চারীন্কুর্বতী ব্যচরত্তদা || ৩২||
কমণ্ডলুজলাক্ষেপহতবীর্যান্ হতৌজসঃ |
ব্রহ্মাণী চাকরোচ্ছত্রূন্যেন যেন স্ম ধাবতি || ৩৩||
মাহেশ্বরী ত্রিশূলেন তথা চক্রেণ বৈষ্ণবী |
দৈত্যাঞ্জঘান কৌমারী তথা শক্ত্যাতিকোপনা || ৩৪||
ঐন্দ্রী কুলিশপাতেন শতশো দৈত্যদানবাঃ |
পেতুর্বিদারিতাঃ পৃথ্ব্যাং রুধিরৌঘপ্রবর্ষিণঃ || ৩৫||
তুণ্ডপ্রহারবিধ্বস্তা দংষ্ট্রাগ্রক্ষতবক্ষসঃ |
বারাহমূর্ত্যা ন্যপতংশ্চক্রেণ চ বিদারিতাঃ || ৩৬||
নখৈর্বিদারিতাংশ্চান্যান্ ভক্ষয়ন্তী মহাসুরান্ |
নারসিংহী চচারাজৌ নাদাপূর্ণদিগম্বরা || ৩৭||
চণ্ডাট্টহাসৈরসুরাঃ শিবদূত্যভিদূষিতাঃ |
পেতুঃ পৃথিব্যাং পতিতাংস্তাংশ্চখাদাথ সা তদা || ৩৮||
ইতি মাতৃগণং ক্রুদ্ধং মর্দয়ন্তং মহাসুরান্ |
দৃষ্ট্বাভ্যুপায়ৈর্বিবিধৈর্নেশুর্দেবারিসৈনিকাঃ || ৩৯||
পলায়নপরান্দৃষ্ট্বা দৈত্যান্মাতৃগণার্দিতান্ |
যোদ্ধুমভ্যায়য়ৌ ক্রুদ্ধো রক্তবীজো মহাসুরঃ || ৪০||
রক্তবিন্দুর্যদা ভূমৌ পতত্যস্য শরীরতঃ |
সমুৎপততি মেদিন্যাং তৎপ্রমাণো মহাসুরঃ || ৪১||
যুয়ুধে স গদাপাণিরিন্দ্রশক্ত্যা মহাসুরঃ |
ততশ্চৈন্দ্রী স্ববজ্রেণ রক্তবীজমতাডয়ৎ || ৪২||
কুলিশেনাহতস্যাশু বহু সুস্রাব শোণিতম্ |
সমুত্তস্থুস্ততো যোধাস্তদ্রূপাস্তৎপরাক্রমাঃ || ৪৩||
যাবন্তঃ পতিতাস্তস্য শরীরাদ্রক্তবিন্দবঃ |
তাবন্তঃ পুরুষা জাতাস্তদ্বীর্যবলবিক্রমাঃ || ৪৪||
তে চাপি যুয়ুধুস্তত্র পুরুষা রক্তসম্ভবাঃ |
সমং মাতৃভিরত্যুগ্রশস্ত্রপাতাতিভীষণম্ || ৪৫||
পুনশ্চ বজ্রপাতেন ক্ষতমস্য শিরো যদা |
ববাহ রক্তং পুরুষাস্ততো জাতাঃ সহস্রশঃ || ৪৬||
বৈষ্ণবী সমরে চৈনং চক্রেণাভিজঘান হ |
গদয়া তাডয়ামাস ঐন্দ্রী তমসুরেশ্বরম্ || ৪৭||
বৈষ্ণবীচক্রভিন্নস্য রুধিরস্রাবসম্ভবৈঃ |
সহস্রশো জগদ্ব্যাপ্তং তৎপ্রমাণৈর্মহাসুরৈঃ || ৪৮||
শক্ত্যা জঘান কৌমারী বারাহী চ তথাসিনা |
মাহেশ্বরী ত্রিশূলেন রক্তবীজং মহাসুরম্ || ৪৯||
স চাপি গদয়া দৈত্যঃ সর্বা এবাহনৎ পৃথক্ |
মাৎৠঃ কোপসমাবিষ্টো রক্তবীজো মহাসুরঃ || ৫০||
তস্যাহতস্য বহুধা শক্তিশূলাদিভির্ভুবি |
পপাত যো বৈ রক্তৌঘস্তেনাসঞ্ছতশোঽসুরাঃ || ৫১||
তৈশ্চাসুরাসৃক্সম্ভূতৈরসুরৈঃ সকলং জগৎ |
ব্যাপ্তমাসীত্ততো দেবা ভয়মাজগ্মুরুত্তমম্ || ৫২||
তান্ বিষণ্ণান্ সুরান্ দৃষ্ট্বা চণ্ডিকা প্রাহসৎবরম্ |
উবাচ কালীং চামুণ্ডে বিস্তীর্ণং বদনং কুরু || ৫৩||
মচ্ছস্ত্রপাতসম্ভূতান্ রক্তবিন্দূন্ মহাসুরান্ |
রক্তবিন্দোঃ প্রতীচ্ছ ৎবং বক্ত্রেণানেন বেগিনা || ৫৪||
ভক্ষয়ন্তী চর রণে তদুৎপন্নান্মহাসুরান্ |
এবমেষ ক্ষয়ং দৈত্যঃ ক্ষেণরক্তো গমিষ্যতি || ৫৫||
ভক্ষ্যমাণাস্ত্বয়া চোগ্রা ন চোৎপৎস্যন্তি চাপরে |
ইত্যুক্ত্বা তাং ততো দেবী শূলেনাভিজঘান তম্ || ৫৬||
মুখেন কালী জগৃহে রক্তবীজস্য শোণিতম্ |
ততোঽসাবাজঘানাথ গদয়া তত্র চণ্ডিকাম্ || ৫৭||
ন চাস্যা বেদনাং চক্রে গদাপাতোঽল্পিকামপি |
তস্যাহতস্য দেহাত্তু বহু সুস্রাব শোণিতম্ || ৫৮||
যতস্ততস্তদ্বক্ত্রেণ চামুণ্ডা সম্প্রতীচ্ছতি |
মুখে সমুদ্গতা যেঽস্যা রক্তপাতান্মহাসুরাঃ || ৫৯||
তাংশ্চখাদাথ চামুণ্ডা পপৌ তস্য চ শোণিতম্ |
দেবী শূলেন বজ্রেণ বাণৈরসিভিরৃষ্টিভিঃ || ৬০||
জঘান রক্তবীজং তং চামুণ্ডাপীতশোণিতম্ |
স পপাত মহীপৃষ্ঠে শস্ত্রসঙ্ঘসমাহতঃ || ৬১||
নীরক্তশ্চ মহীপাল রক্তবীজো মহাসুরঃ |
ততস্তে হর্ষমতুলমবাপুস্ত্রিদশা নৃপ || ৬২||
তেষাং মাতৃগণো জাতো ননর্তাসৃঙ্মদোদ্ধতঃ || ৬৩||
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
রক্তবীজবধো নামাষ্টমোঽধ্যায়ঃ || ৮||
________________________________________
|| নবমোঽধ্যায়ঃ ||
ওঁ রাজোবাচ || ১||
বিচিত্রমিদমাখ্যাতং ভগবন্ ভবতা মম |
দেব্যাশ্চরিতমাহাত্ম্যং রক্তবীজবধাশ্রিতম্ || ২||
ভূয়শ্চেচ্ছাম্যহং শ্রোতুং রক্তবীজে নিপাতিতে |
চকার শুম্ভো যৎকর্ম নিশুম্ভশ্চাতিকোপনঃ || ৩||
ঋষিরুবাচ || ৪||
চকার কোপমতুলং রক্তবীজে নিপাতিতে |
শুম্ভাসুরো নিশুম্ভশ্চ হতেষ্বন্যেষু চাহবে || ৫||
হন্যমানং মহাসৈন্যং বিলোক্যামর্ষমুদ্বহন্ |
অভ্যধাবন্নিশুম্ভোঽথ মুখ্যয়াসুরসেনয়া || ৬||
তস্যাগ্রতস্তথা পৃষ্ঠে পার্শ্বয়োশ্চ মহাসুরাঃ |
সংদষ্টৌষ্ঠপুটাঃ ক্রুদ্ধা হন্তুং দেবীমুপায়য়ুঃ || ৭||
আজগাম মহাবীর্যঃ শুম্ভোঽপি স্ববলৈর্বৃতঃ |
নিহন্তুং চণ্ডিকাং কোপাৎকৃৎবা যুদ্ধং তু মাতৃভিঃ || ৮||
ততো যুদ্ধমতীবাসীদ্দেব্যা শুম্ভনিশুম্ভয়োঃ |
শরবর্ষমতীবোগ্রং মেঘয়োরিব বর্ষতোঃ || ৯||
চিচ্ছেদাস্তাঞ্ছরাংস্তাভ্যাং চণ্ডিকা স্বশরোৎকরৈঃ |
তাডয়ামাস চাঙ্গেষু শস্ত্রৌঘৈরসুরেশ্বরৌ || ১০||
নিশুম্ভো নিশিতং খড্গং চর্ম চাদায় সুপ্রভম্ |
অতাডয়ন্মূর্ধ্নি সিংহং দেব্যা বাহনমুত্তমম্ || ১১||
তাডিতে বাহনে দেবী ক্ষুরপ্রেণাসিমুত্তমম্ |
নিশুম্ভস্যাশু চিচ্ছেদ চর্ম চাপ্যষ্টচন্দ্রকম্ || ১২||
ছিন্নে চর্মণি খড্গে চ শক্তিং চিক্ষেপ সোঽসুরঃ |
তামপ্যস্য দ্বিধা চক্রে চক্রেণাভিমুখাগতাম্ || ১৩||
কোপাধ্মাতো নিশুম্ভোঽথ শূলং জগ্রাহ দানবঃ |
আয়াতং মুষ্টিপাতেন দেবী তচ্চাপ্যচূর্ণয়ৎ || ১৪||
আবিধ্যাথ গদাং সোঽপি চিক্ষেপ চণ্ডিকাং প্রতি |
সাপি দেব্যাস্ ত্রিশূলেন ভিন্না ভস্মৎবমাগতা || ১৫||
ততঃ পরশুহস্তং তমায়ান্তং দৈত্যপুঙ্গবম্ |
আহত্য দেবী বাণৌঘৈরপাতয়ত ভূতলে || ১৬||
তস্মিন্নিপতিতে ভূমৌ নিশুম্ভে ভীমবিক্রমে |
ভ্রাতর্যতীব সংক্রুদ্ধঃ প্রয়য়ৌ হন্তুমম্বিকাম্ || ১৭||
স রথস্থস্তথাত্যুচ্চৈর্গৃহীতপরমায়ুধৈঃ |
ভুজৈরষ্টাভিরতুলৈর্ব্যাপ্যাশেষং বভৌ নভঃ || ১৮||
তমায়ান্তং সমালোক্য দেবী শঙ্খমবাদয়ৎ |
জ্যাশব্দং চাপি ধনুষশ্চকারাতীব দুঃসহম্ || ১৯||
পূরয়ামাস ককুভো নিজঘণ্টাস্বনেন চ |
সমস্তদৈত্যসৈন্যানাং তেজোবধবিধায়িনা || ২০||
ততঃ সিংহো মহানাদৈস্ত্যাজিতেভমহামদৈঃ |
পূরয়ামাস গগনং গাং তথৈব দিশো দশ || ২১||
ততঃ কালী সমুৎপত্য গগনং ক্ষ্মামতাডয়ৎ |
করাভ্যাং তন্নিনাদেন প্রাক্স্বনাস্তে তিরোহিতাঃ || ২২||
অট্টাট্টহাসমশিবং শিবদূতী চকার হ |
বৈঃ শব্দৈরসুরাস্ত্রেসুঃ শুম্ভঃ কোপং পরং যয়ৌ || ২৩||
দুরাত্মংস্তিষ্ঠ তিষ্ঠেতি ব্যাজহারাম্বিকা যদা |
তদা জয়েত্যভিহিতং দেবৈরাকাশসংস্থিতৈঃ || ২৪||
শুম্ভেনাগত্য যা শক্তির্মুক্তা জ্বালাতিভীষণা |
আয়ান্তী বহ্নিকূটাভা সা নিরস্তা মহোল্কয়া || ২৫||
সিংহনাদেন শুম্ভস্য ব্যাপ্তং লোকত্রয়ান্তরম্ |
নির্ঘাতনিঃস্বনো ঘোরো জিতবানবনীপতে || ২৬||
শুম্ভমুক্তাঞ্ছরান্দেবী শুম্ভস্তৎপ্রহিতাঞ্ছরান্ |
চিচ্ছেদ স্বশরৈরুগ্রৈঃ শতশোঽথ সহস্রশঃ || ২৭||
ততঃ সা চণ্ডিকা ক্রুদ্ধা শূলেনাভিজঘান তম্ |
স তদাভিহতো ভূমৌ মূর্চ্ছিতো নিপপাত হ || ২৮||
ততো নিশুম্ভঃ সম্প্রাপ্য চেতনামাত্তকার্মুকঃ |
আজঘান শরৈর্দেবীং কালীং কেসরিণং তথা || ২৯||
পুনশ্চ কৃৎবা বাহূনাময়ুতং দনুজেশ্বরঃ |
চক্রায়ুধেন দিতিজশ্ছাদয়ামাস চণ্ডিকাম্ || ৩০||
ততো ভগবতী ক্রুদ্ধা দুর্গা দুর্গার্তিনাশিনী |
চিচ্ছেদ দেবী চক্রাণি স্বশরৈঃ সায়কাংশ্চ তান্ || ৩১||
ততো নিশুম্ভো বেগেন গদামাদায় চণ্ডিকাম্ |
অভ্যধাবত বৈ হন্তুং দৈত্যসৈন্যসমাবৃতঃ || ৩২||
তস্যাপতত এবাশু গদাং চিচ্ছেদ চণ্ডিকা |
খড্গেন শিতধারেণ স চ শূলং সমাদদে || ৩৩||
শূলহস্তং সমায়ান্তং নিশুম্ভমমরার্দনম্ |
হৃদি বিব্যাধ শূলেন বেগাবিদ্ধেন চণ্ডিকা || ৩৪||
ভিন্নস্য তস্য শূলেন হৃদয়ান্নিঃসৃতোঽপরঃ |
মহাবলো মহাবীর্যস্তিষ্ঠেতি পুরুষো বদন্ || ৩৫||
তস্য নিষ্ক্রামতো দেবী প্রহস্য স্বনবত্ততঃ |
শিরশ্চিচ্ছেদ খড্গেন ততোঽসাবপতদ্ভুবি || ৩৬||
ততঃ সিংহশ্চখাদোগ্রদংষ্ট্রাক্ষুণ্ণশিরোধরান্ |
অসুরাংস্তাংস্তথা কালী শিবদূতী তথাপরান্ || ৩৭||
কৌমারীশক্তিনির্ভিন্নাঃ কেচিন্নেশুর্মহাসুরাঃ |
ব্রহ্মাণীমন্ত্রপূতেন তোয়েনান্যে নিরাকৃতাঃ || ৩৮||
মাহেশ্বরীত্রিশূলেন ভিন্নাঃ পেতুস্তথাপরে |
বারাহীতুণ্ডঘাতেন কেচিচ্চূর্ণীকৃতা ভুবি || ৩৯||
খণ্ডং খণ্ডং চ চক্রেণ বৈষ্ণব্যা দানবাঃ কৃতাঃ |
বজ্রেণ চৈন্দ্রীহস্তাগ্রবিমুক্তেন তথাপরে || ৪০||
কেচিদ্বিনেশুরসুরাঃ কেচিন্নষ্টা মহাহবাৎ |
ভক্ষিতাশ্চাপরে কালীশিবদূতীমৃগাধিপৈঃ || ৪১||
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
নিশুম্ভবধো নাম নবমোঽধ্যায়ঃ || ৯||
________________________________________
|| দশমোঽধ্যায়ঃ ||
ওঁ ঋষিরুবাচ || ১||
নিশুম্ভং নিহতং দৃষ্ট্বা ভ্রাতরং প্রাণসম্মিতম্ |
হন্যমানং বলং চৈব শুম্ভঃ ক্রুদ্ধোঽব্রবীদ্বচঃ || ২||
বলাবলেপদুষ্টে ৎবং মা দুর্গে গর্বমাবহ |
অন্যাসাং বলমাশ্রিত্য যুদ্ধ্যসে চাতিমানিনী || ৩||
দেব্যুবাচ || ৪||
একৈবাহং জগত্যত্র দ্বিতীয়া কা মমাপরা |
পশ্যৈতা দুষ্ট ময়্যেব বিশন্ত্যো মদ্বিভূতয়ঃ || ৫||
ততঃ সমস্তাস্তা দেব্যো ব্রহ্মাণীপ্রমুখা লয়ম্ |
তস্যা দেব্যাস্তনৌ জগ্মুরেকৈবাসীত্তদাম্বিকা || ৬||
দেব্যুবাচ || ৭||
অহং বিভূত্যা বহুভিরিহ রূপৈর্যদাস্থিতা |
তৎসংহৃতং ময়ৈকৈব তিষ্ঠাম্যাজৌ স্থিরো ভব || ৮||
ঋষিরুবাচ || ৯||
ততঃ প্রববৃতে যুদ্ধং দেব্যাঃ শুম্ভস্য চোভয়োঃ |
পশ্যতাং সর্বদেবানামসুরাণাং চ দারুণম্ || ১০||
শরবর্ষৈঃ শিতৈঃ শস্ত্রৈস্তথা চাস্ত্রৈঃ সুদারুণৈঃ |
তয়োর্যুদ্ধমভূদ্ভূয়ঃ সর্বলোকভয়ঙ্করম্ || ১১||
দিব্যান্যস্ত্রাণি শতশো মুমুচে যান্যথাম্বিকা |
বভঞ্জ তানি দৈত্যেন্দ্রস্তৎপ্রতীঘাতকর্তৃভিঃ || ১২||
মুক্তানি তেন চাস্ত্রাণি দিব্যানি পরমেশ্বরী |
বভঞ্জ লীলয়ৈবোগ্রহুঙ্কারোচ্চারণাদিভিঃ || ১৩||
ততঃ শরশতৈর্দেবীমাচ্ছাদয়ত সোঽসুরঃ |
সাপি তৎকুপিতা দেবী ধনুশ্চিচ্ছেদ চেষুভিঃ || ১৪||
ছিন্নে ধনুষি দৈত্যেন্দ্রস্তথা শক্তিমথাদদে |
চিচ্ছেদ দেবী চক্রেণ তামপ্যস্য করে স্থিতাম্ || ১৫||
ততঃ খড্গমুপাদায় শতচন্দ্রং চ ভানুমৎ |
অভ্যধা বত তাং দেবীং দৈত্যানামধিপেশ্বরঃ || ১৬||
তস্যাপতত এবাশু খড্গং চিচ্ছেদ চণ্ডিকা |
ধনুর্মুক্তৈঃ শিতৈর্বাণৈশ্চর্ম চার্ককরামলম্ |
অশ্বাংশ্চ পাতয়ামাস রথং সারথিনা সহ || ১৭||
হতাশ্বঃ স তদা দৈত্যশ্ছিন্নধন্বা বিসারথিঃ |
জগ্রাহ মুদ্গরং ঘোরমম্বিকানিধনোদ্যতঃ || ১৮||
চিচ্ছেদাপততস্তস্য মুদ্গরং নিশিতৈঃ শরৈঃ |
তথাপি সোঽভ্যধাবত্তাং মুষ্টিমুদ্যম্য বেগবান্ || ১৯||
স মুষ্টিং পাতয়ামাস হৃদয়ে দৈত্যপুঙ্গবঃ |
দেব্যাস্তং চাপি সা দেবী তলেনোরস্যতাডয়ৎ || ২০||
তলপ্রহারাভিহতো নিপপাত মহীতলে |
স দৈত্যরাজঃ সহসা পুনরেব তথোত্থিতঃ || ২১||
উৎপত্য চ প্রগৃহ্যোচ্চৈর্দেবীং গগনমাস্থিতঃ |
তত্রাপি সা নিরাধারা যুয়ুধে তেন চণ্ডিকা || ২২||
নিয়ুদ্ধং খে তদা দৈত্যশ্চণ্ডিকা চ পরস্পরম্ |
চক্রতুঃ প্রথমং সিদ্ধমুনিবিস্ময়কারকম্ || ২৩||
ততো নিয়ুদ্ধং সুচিরং কৃৎবা তেনাম্বিকা সহ |
উৎপাট্য ভ্রাময়ামাস চিক্ষেপ ধরণীতলে || ২৪||
স ক্ষিপ্তো ধরণীং প্রাপ্য মুষ্টিমুদ্যম্য বেগবান্ |
অভ্যধাবত দুষ্টাত্মা চণ্ডিকানিধনেচ্ছয়া || ২৫||
তমায়ান্তং ততো দেবী সর্বদৈত্যজনেশ্বরম্ |
জগত্যাং পাতয়ামাস ভিত্ত্বা শূলেন বক্ষসি || ২৬||
স গতাসুঃ পপাতোর্ব্যাং দেবী শূলাগ্রবিক্ষতঃ |
চালয়ন্ সকলাং পৃথ্বীং সাব্ধিদ্বীপাং সপর্বতাম্ || ২৭||
ততঃ প্রসন্নমখিলং হতে তস্মিন্ দুরাত্মনি |
জগৎস্বাস্থ্যমতীবাপ নির্মলং চাভবন্নভঃ || ২৮||
উৎপাতমেঘাঃ সোল্কা যে প্রাগাসংস্তে শমং যয়ুঃ |
সরিতো মার্গবাহিন্যস্তথাসংস্তত্র পাতিতে || ২৯||
ততো দেবগণাঃ সর্বে হর্ষনির্ভরমানসাঃ |
বভূবুর্নিহতে তস্মিন্ গন্ধর্বা ললিতং জগুঃ || ৩০||
অবাদয়ংস্তথৈবান্যে ননৃতুশ্চাপ্সরোগণাঃ |
ববুঃ পুণ্যাস্তথা বাতাঃ সুপ্রভোঽভূদ্দিবাকরঃ || ৩১||
জজ্বলুশ্চাগ্নয়ঃ শান্তাঃ শান্তা দিগ্জনিতস্বনাঃ || ৩২||
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে
দেবীমাহাত্ম্যে শুম্ভবধো নাম দশমোঽধ্যায়ঃ || ১০||
________________________________________
|| একাদশোঽধ্যায়ঃ ||
ওঁ ঋষিরুবাচ || ১||
দেব্যা হতে তত্র মহাসুরেন্দ্রে
সেন্দ্রাঃ সুরা বহ্নিপুরোগমাস্তাম্ |
কাত্যায়নীং তুষ্টুবুরিষ্টলাভাদ্
বিকাশিবক্ত্রাব্জবিকাশিতাশাঃ || ২||
দেবি প্রপন্নার্তিহরে প্রসীদ
প্রসীদ মাতর্জগতোঽখিলস্য |
প্রসীদ বিশ্বেশ্বরি পাহি বিশ্বং
ৎবমীশ্বরী দেবি চরাচরস্য || ৩||
আধারভূতা জগতস্ত্বমেকা
মহীস্বরূপেণ যতঃ স্থিতাসি |
অপাং স্বরূপস্থিতয়া ৎবয়ৈত-
দাপ্যায়তে কৃৎস্নমলঙ্ঘ্যবীর্যে || ৪||
ৎবং বৈষ্ণবীশক্তিরনন্তবীর্যা
বিশ্বস্য বীজং পরমাসি মায়া |
সম্মোহিতং দেবি সমস্তমেতৎ
ৎবং বৈ প্রসন্না ভুবি মুক্তিহেতুঃ || ৫||
বিদ্যাঃ সমস্তাস্তব দেবি ভেদাঃ
স্ত্রিয়ঃ সমস্তাঃ সকলা জগৎসু |
ৎবয়ৈকয়া পূরিতমম্বয়ৈতৎ
কা তে স্তুতিঃ স্তব্যপরাপরোক্তিঃ || ৬||
সর্বভূতা যদা দেবী ভুক্তিমুক্তিপ্রদায়িনী |
ৎবং স্তুতা স্তুতয়ে কা বা ভবন্তু পরমোক্তয়ঃ || ৭||
সর্বস্য বুদ্ধিরূপেণ জনস্য হৃদি সংস্থিতে |
স্বর্গাপবর্গদে দেবি নারায়ণি নমোঽস্তু তে || ৮||
কলাকাষ্ঠাদিরূপেণ পরিণামপ্রদায়িনি |
বিশ্বস্যোপরতৌ শক্তে নারায়ণি নমোঽস্তু তে || ৯||
সর্বমঙ্গলমাঙ্গল্যে শিবে সর্বার্থসাধিকে |
শরণ্যে ত্র্যম্বকে গৌরি নারায়ণি নমোঽস্তু তে || ১০||
সৃষ্টিস্থিতিবিনাশানাং শক্তিভূতে সনাতনি |
গুণাশ্রয়ে গুণময়ে নারায়ণি নমোঽস্তু তে || ১১||
শরণাগতদীনার্তপরিত্রাণপরায়ণে |
সর্বস্যার্তিহরে দেবি নারায়ণি নমোঽস্তু তে || ১২||
হংসয়ুক্তবিমানস্থে ব্রহ্মাণীরূপধারিণি |
কৌশাম্ভঃক্ষরিকে দেবি নারায়ণি নমোঽস্তু তে || ১৩||
ত্রিশূলচন্দ্রাহিধরে মহাবৃষভবাহিনি |
মাহেশ্বরীস্বরূপেণ নারায়ণি নমোঽস্তুতে || ১৪||
ময়ূরকুক্কুটবৃতে মহাশক্তিধরেঽনঘে |
কৌমারীরূপসংস্থানে নারায়ণি নমোঽস্তু তে || ১৫||
শঙ্খচক্রগদাশার্ঙ্গগৃহীতপরমায়ুধে |
প্রসীদ বৈষ্ণবীরূপে নারায়ণি নমোঽস্তু তে || ১৬||
গৃহীতোগ্রমহাচক্রে দংষ্ট্রোদ্ধৃতবসুন্ধরে |
বরাহরূপিণি শিবে নারায়ণি নমোঽস্তু তে || ১৭||
নৃসিংহরূপেণোগ্রেণ হন্তুং দৈত্যান্ কৃতোদ্যমে |
ত্রৈলোক্যত্রাণসহিতে নারায়ণি নমোঽস্তু তে || ১৮||
কিরীটিনি মহাবজ্রে সহস্রনয়নোজ্জ্বলে |
বৃত্রপ্রাণহরে চৈন্দ্রি নারায়ণি নমোঽস্তু তে || ১৯||
শিবদূতীস্বরূপেণ হতদৈত্যমহাবলে |
ঘোররূপে মহারাবে নারায়ণি নমোঽস্তু তে || ২০||
দংষ্ট্রাকরালবদনে শিরোমালাবিভূষণে |
চামুণ্ডে মুণ্ডমথনে নারায়ণি নমোঽস্তু তে || ২১||
লক্ষ্মি লজ্জে মহাবিদ্যে শ্রদ্ধে পুষ্টি স্বধে ধ্রুবে |
মহারাত্রি মহামায়ে নারায়ণি নমোঽস্তু তে || ২২||
মেধে সরস্বতি বরে ভূতি বাভ্রবি তামসি |
নিয়তে ৎবং প্রসীদেশে নারায়ণি নমোঽস্তুতে || ২৩||
সর্বস্বরূপে সর্বেশে সর্বশক্তিসমন্বিতে |
ভয়েভ্যস্ত্রাহি নো দেবি দুর্গে দেবি নমোঽস্তু তে || ২৪||
এতত্তে বদনং সৌম্যং লোচনত্রয়ভূষিতম্ |
পাতু নঃ সর্বভূতেভ্যঃ কাত্যায়নি নমোঽস্তু তে || ২৫||
জ্বালাকরালমত্যুগ্রমশেষাসুরসূদনম্ |
ত্রিশূলং পাতু নো ভীতের্ভদ্রকালি নমোঽস্তু তে || ২৬||
হিনস্তি দৈত্যতেজাংসি স্বনেনাপূর্য যা জগৎ |
সা ঘণ্টা পাতু নো দেবি পাপেভ্যো নঃ সুতানিব || ২৭||
অসুরাসৃগ্বসাপঙ্কচর্চিতস্তে করোজ্জ্বলঃ |
শুভায় খড্গো ভবতু চণ্ডিকে ৎবাং নতা বয়ম্ || ২৮||
রোগানশেষানপহংসি তুষ্টা
রুষ্টা তু কামান্ সকলানভীষ্টান্ |
ৎবামাশ্রিতানাং ন বিপন্নরাণাং
ৎবামাশ্রিতা হ্যাশ্রয়তাং প্রয়ান্তি || ২৯||
এতৎকৃতং যৎকদনং ৎবয়াদ্য
ধর্মদ্বিষাং দেবি মহাসুরাণাম্ |
রূপৈরনেকৈর্বহুধাত্মমূর্তিং
কৃৎবাম্বিকে তৎপ্রকরোতি কান্যা || ৩০||
বিদ্যাসু শাস্ত্রেষু বিবেকদীপে-
ষ্বাদ্যেষু বাক্যেষু চ কা ৎবদন্যা |
মমৎবগর্তেঽতিমহান্ধকারে
বিভ্রাময়ত্যেতদতীব বিশ্বম্ || ৩১||
রক্ষাংসি যত্রোগ্রবিষাশ্চ নাগা
যত্রারয়ো দস্যুবলানি যত্র |
দাবানলো যত্র তথাব্ধিমধ্যে
তত্র স্থিতা ৎবং পরিপাসি বিশ্বম্ || ৩২||
বিশ্বেশ্বরি ৎবং পরিপাসি বিশ্বং
বিশ্বাত্মিকা ধারয়সীহ বিশ্বম্ |
বিশ্বেশবন্দ্যা ভবতী ভবন্তি
বিশ্বাশ্রয়া যে ৎবয়ি ভক্তিনম্রাঃ || ৩৩||
দেবি প্রসীদ পরিপালয় নোঽরিভীতে-
র্নিত্যং যথাসুরবধাদধুনৈব সদ্যঃ |
পাপানি সর্বজগতাং প্রশমং নয়াশু
উৎপাতপাকজনিতাংশ্চ মহোপসর্গান্ || ৩৪||
প্রণতানাং প্রসীদ ৎবং দেবি বিশ্বার্তিহারিণি |
ত্রৈলোক্যবাসিনামীড্যে লোকানাং বরদা ভব || ৩৫||
দেব্যুবাচ || ৩৬||
বরদাহং সুরগণা বরং যন্মনসেচ্ছথ |
তং বৃণুধ্বং প্রয়চ্ছামি জগতামুপকারকম্ || ৩৭||
দেবা ঊচুঃ || ৩৮||
সর্বাবাধাপ্রশমনং ত্রৈলোক্যস্যাখিলেশ্বরি |
এবমেব ৎবয়া কার্যমস্মদ্বৈরিবিনাশনম্ || ৩৯||
দেব্যুবাচ || ৪০||
বৈবস্বতেঽন্তরে প্রাপ্তে অষ্টাবিংশতিমে যুগে |
শুম্ভো নিশুম্ভশ্চৈবান্যাবুৎপৎস্যেতে মহাসুরৌ || ৪১||
নন্দগোপগৃহে জাতা যশোদাগর্ভসম্ভবা |
ততস্তৌ নাশয়িষ্যামি বিন্ধ্যাচলনিবাসিনী || ৪২||
পুনরপ্যতিরৌদ্রেণ রূপেণ পৃথিবীতলে |
অবতীর্য হনিষ্যামি বৈপ্রচিত্তাংশ্চ দানবান্ || ৪৩||
ভক্ষয়ন্ত্যাশ্চ তানুগ্রান্ বৈপ্রচিত্তান্ মহাসুরান্ |
রক্তা দন্তা ভবিষ্যন্তি দাডিমীকুসুমোপমাঃ || ৪৪||
ততো মাং দেবতাঃ স্বর্গে মর্ত্যলোকে চ মানবাঃ |
স্তুবন্তো ব্যাহরিষ্যন্তি সততং রক্তদন্তিকাম্ || ৪৫||
ভূয়শ্চ শতবার্ষিক্যামনাবৃষ্ট্যামনম্ভসি |
মুনিভিঃ সংস্মৃতা ভূমৌ সম্ভবিষ্যাম্যয়োনিজা || ৪৬||
ততঃ শতেন নেত্রাণাং নিরীক্ষিষ্যাম্যহং মুনীন্ |
কীর্তয়িষ্যন্তি মনুজাঃ শতাক্ষীমিতি মাং ততঃ || ৪৭||
ততোঽহমখিলং লোকমাত্মদেহসমুদ্ভবৈঃ |
ভরিষ্যামি সুরাঃ শাকৈরাবৃষ্টেঃ প্রাণধারকৈঃ || ৪৮||
শাকম্ভরীতি বিখ্যাতিং তদা যাস্যাম্যহং ভুবি |
তত্রৈব চ বধিষ্যামি দুর্গমাখ্যং মহাসুরম্ || ৪৯||
দুর্গাদেবীতি বিখ্যাতং তন্মে নাম ভবিষ্যতি |
পুনশ্চাহং যদা ভীমং রূপং কৃৎবা হিমাচলে || ৫০||
রক্ষাংসি ভক্ষয়িষ্যামি মুনীনাং ত্রাণকারণাৎ |
তদা মাং মুনয়ঃ সর্বে স্তোষ্যন্ত্যানম্রমূর্তয়ঃ || ৫১||
ভীমাদেবীতি বিখ্যাতং তন্মে নাম ভবিষ্যতি |
যদারুণাখ্যস্ত্রৈলোক্যে মহাবাধাং করিষ্যতি || ৫২||
তদাহং ভ্রামরং রূপং কৃৎবাসংখ্যেয়ষট্পদম্ |
ত্রৈলোক্যস্য হিতার্থায় বধিষ্যামি মহাসুরম্ || ৫৩||
ভ্রামরীতি চ মাং লোকাস্তদা স্তোষ্যন্তি সর্বতঃ |
ইত্থং যদা যদা বাধা দানবোত্থা ভবিষ্যতি || ৫৪||
তদা তদাবতীর্যাহং করিষ্যাম্যরিসংক্ষয়ম্ || ৫৫||
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
নারায়ণীস্তুতির্নামৈকাদশোঽধ্যায়ঃ || ১১||
________________________________________
|| দ্বাদশোঽধ্যায়ঃ ||
ওঁ দেব্যুবাচ || ১||
এভিঃ স্তবৈশ্চ মাং নিত্যং স্তোষ্যতে যঃ সমাহিতঃ |
তস্যাহং সকলাং বাধাং শময়িষ্যাম্যসংশয়ম্ || ২||
মধুকৈটভনাশং চ মহিষাসুরঘাতনম্ |
কীর্তয়িষ্যন্তি যে তদ্বদ্বধং শুম্ভনিশুম্ভয়োঃ || ৩||
অষ্টম্যাং চ চতুর্দশ্যাং নবম্যাং চৈকচেতসঃ |
শ্রোষ্যন্তি চৈব যে ভক্ত্যা মম মাহাত্ম্যমুত্তমম্ || ৪||
ন তেষাং দুষ্কৃতং কিঞ্চিদ্দুষ্কৃতোত্থা ন চাপদঃ |
ভবিষ্যতি ন দারিদ্র্যং ন চৈবেষ্টবিয়োজনম্ || ৫||
শত্রুভ্যো ন ভয়ং তস্য দস্যুতো বা ন রাজতঃ |
ন শস্ত্রানলতোয়ৌঘাৎ কদাচিৎ সম্ভবিষ্যতি || ৬||
তস্মান্মমৈতন্মাহাত্ম্যং পঠিতব্যং সমাহিতৈঃ |
শ্রোতব্যং চ সদা ভক্ত্যা পরং স্বস্ত্যয়নং মহৎ || ৭||
উপসর্গানশেষাংস্তু মহামারীসমুদ্ভবান্ |
তথা ত্রিবিধমুৎপাতং মাহাত্ম্যং শময়েন্মম || ৮||
যত্রৈতৎপঠ্যতে সম্যঙ্নিত্যমায়তনে মম |
সদা ন তদ্বিমোক্ষ্যামি সাংনিধ্যং তত্র মে স্থিতম্ || ৯||
বলিপ্রদানে পূজায়ামগ্নিকার্যে মহোৎসবে |
সর্বং মমৈতন্মাহাত্ম্যম্ উচ্চার্যং শ্রাব্যমেব চ || ১০||
জানতাজানতা বাপি বলিপূজাং যথা কৃতাম্ |
প্রতীক্ষিষ্যাম্যহং প্রীত্যা বহ্নিহোমং তথাকৃতম্ || ১১||
শরৎকালে মহাপূজা ক্রিয়তে যা চ বার্ষিকী |
তস্যাং মমৈতন্মাহাত্ম্যং শ্রুৎবা ভক্তিসমন্বিতঃ || ১২||
সর্বাবাধাবিনির্মুক্তো ধনধান্যসমন্বিতঃ |
মনুষ্যো মৎপ্রসাদেন ভবিষ্যতি ন সংশয়ঃ || ১৩||
শ্রুৎবা মমৈতন্মাহাত্ম্যং তথা চোৎপত্তয়ঃ শুভাঃ |
পরাক্রমং চ যুদ্ধেষু জায়তে নির্ভয়ঃ পুমান্ || ১৪||
রিপবঃ সংক্ষয়ং যান্তি কল্যাণং চোপপদ্যতে |
নন্দতে চ কুলং পুংসাং মাহাত্ম্যং মম শৃণ্বতাম্ || ১৫||
শান্তিকর্মণি সর্বত্র তথা দুঃস্বপ্নদর্শনে |
গ্রহপীডাসু চোগ্রাসু মাহাত্ম্যং শৃণুয়ান্মম || ১৬||
উপসর্গাঃ শমং যান্তি গ্রহপীডাশ্চ দারুণাঃ |
দুঃস্বপ্নং চ নৃভির্দৃষ্টং সুস্বপ্নমুপজায়তে || ১৭||
বালগ্রহাভিভূতানাং বালানাং শান্তিকারকম্ |
সংঘাতভেদে চ নৃণাং মৈত্রীকরণমুত্তমম্ || ১৮||
দুর্বৃত্তানামশেষাণাং বলহানিকরং পরম্ |
রক্ষোভূতপিশাচানাং পঠনাদেব নাশনম্ || ১৯||
সর্বং মমৈতন্মাহাত্ম্যং মম সন্নিধিকারকম্ |
পশুপুষ্পার্ঘ্যধূপৈশ্চ গন্ধদীপৈস্তথোত্তমৈঃ || ২০||
বিপ্রাণাং ভোজনৈর্হোমৈঃ প্রোক্ষণীয়ৈরহর্নিশম্ |
অন্যৈশ্চ বিবিধৈর্ভোগৈঃ প্রদানৈর্বৎসরেণ যা || ২১||
প্রীতির্মে ক্রিয়তে সাস্মিন্ সকৃদুচ্চরিতে শ্রুতে |
শ্রুতং হরতি পাপানি তথারোগ্যং প্রয়চ্ছতি || ২২||
রক্ষাং করোতি ভূতেভ্যো জন্মনাং কীর্তনং মম |
যুদ্ধেষু চরিতং যন্মে দুষ্টদৈত্যনিবর্হণম্ || ২৩||
তস্মিঞ্ছ্রুতে বৈরিকৃতং ভয়ং পুংসাং ন জায়তে |
যুষ্মাভিঃ স্তুতয়ো যাশ্চ যাশ্চ ব্রহ্মর্ষিভিঃ কৃতাঃ || ২৪||
ব্রহ্মণা চ কৃতাস্তাস্তু প্রয়চ্ছন্তু শুভাং মতিম্ |
অরণ্যে প্রান্তরে বাপি দাবাগ্নিপরিবারিতঃ || ২৫||
দস্যুভির্বা বৃতঃ শূন্যে গৃহীতো বাপি শত্রুভিঃ |
সিংহব্যাঘ্রানুয়াতো বা বনে বা বনহস্তিভিঃ || ২৬||
রাজ্ঞা ক্রুদ্ধেন চাজ্ঞপ্তো বধ্যো বন্ধগতোঽপি বা |
আঘূর্ণিতো বা বাতেন স্থিতঃ পোতে মহার্ণবে || ২৭||
পতৎসু চাপি শস্ত্রেষু সংগ্রামে ভৃশদারুণে |
সর্বাবাধাসু ঘোরাসু বেদনাভ্যর্দিতোঽপি বা || ২৮||
স্মরন্ মমৈতচ্চরিতং নরো মুচ্যেত সঙ্কটাৎ |
মম প্রভাবাৎসিংহাদ্যা দস্যবো বৈরিণস্তথা || ২৯||
দূরাদেব পলায়ন্তে স্মরতশ্চরিতং মম || ৩০||
ঋষিরুবাচ || ৩১||
ইত্যুক্ত্বা সা ভগবতী চণ্ডিকা চণ্ডবিক্রমা || ৩২||
পশ্যতাং সর্বদেবানাং তত্রৈবান্তরধীয়ত |
তেঽপি দেবা নিরাতঙ্কাঃ স্বাধিকারান্যথা পুরা || ৩৩||
যজ্ঞভাগভুজঃ সর্বে চক্রুর্বিনিহতারয়ঃ |
দৈত্যাশ্চ দেব্যা নিহতে শুম্ভে দেবরিপৌ যুধি || ৩৪||
জগদ্বিধ্বংসকে তস্মিন্ মহোগ্রেঽতুলবিক্রমে |
নিশুম্ভে চ মহাবীর্যে শেষাঃ পাতালমায়য়ুঃ || ৩৫||
এবং ভগবতী দেবী সা নিত্যাপি পুনঃ পুনঃ |
সম্ভূয় কুরুতে ভূপ জগতঃ পরিপালনম্ || ৩৬||
তয়ৈতন্মোহ্যতে বিশ্বং সৈব বিশ্বং প্রসূয়তে |
সা যাচিতা চ বিজ্ঞানং তুষ্টা ঋদ্ধিং প্রয়চ্ছতি || ৩৭||
ব্যাপ্তং তয়ৈতৎসকলং ব্রহ্মাণ্ডং মনুজেশ্বর |
মহাদেব্যা মহাকালী মহামারীস্বরূপয়া || ৩৮||
সৈব কালে মহামারী সৈব সৃষ্টির্ভবত্যজা |
স্থিতিং করোতি ভূতানাং সৈব কালে সনাতনী || ৩৯||
ভবকালে নৃণাং সৈব লক্ষ্মীর্বৃদ্ধিপ্রদা গৃহে |
সৈবাভাবে তথালক্ষ্মীর্বিনাশায়োপজায়তে || ৪০||
স্তুতা সম্পূজিতা পুষ্পৈর্গন্ধধূপাদিভিস্তথা |
দদাতি বিত্তং পুত্রাংশ্চ মতিং ধর্মে গতিং শুভাম্ || ৪১||
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
ভগবতী বাক্যং দ্বাদশোঽধ্যায়ঃ || ১২||
________________________________________
|| ত্রয়োদশোঽধ্যায়ঃ ||
ওঁ ঋষিরুবাচ || ১||
এতত্তে কথিতং ভূপ দেবীমাহাত্ম্যমুত্তমম্ |
এবংপ্রভাবা সা দেবী যয়েদং ধার্যতে জগৎ || ২||
বিদ্যা তথৈব ক্রিয়তে ভগবদ্বিষ্ণুমায়য়া |
তয়া ৎবমেষ বৈশ্যশ্চ তথৈবান্যে বিবেকিনঃ || ৩||
মোহ্যন্তে মোহিতাশ্চৈব মোহমেষ্যন্তি চাপরে |
তামুপৈহি মহারাজ শরণং পরমেশ্বরীম্ || ৪||
আরাধিতা সৈব নৃণাং ভোগস্বর্গাপবর্গদা || ৫||
মার্কণ্ডেয় উবাচ || ৬||
ইতি তস্য বচঃ শ্রুৎবা সুরথঃ স নরাধিপঃ || ৭||
প্রণিপত্য মহাভাগং তমৃষিং সংশিতব্রতম্ |
নির্বিণ্ণোঽতিমমৎবেন রাজ্যাপহরণেন চ || ৮||
জগাম সদ্যস্তপসে স চ বৈশ্যো মহামুনে |
সংদর্শনার্থমম্বায়া নদীপুলিনমাস্থিতঃ || ৯||
স চ বৈশ্যস্তপস্তেপে দেবীসূক্তং পরং জপন্ |
তৌ তস্মিন্ পুলিনে দেব্যাঃ কৃৎবা মূর্তিং মহীময়ীম্ || ১০||
অর্হণাং চক্রতুস্তস্যাঃ পুষ্পধূপাগ্নিতর্পণৈঃ |
নিরাহারৌ যতাত্মানৌ তন্মনস্কৌ সমাহিতৌ || ১১||
দদতুস্তৌ বলিং চৈব নিজগাত্রাসৃগুক্ষিতম্ |
এবং সমারাধয়তোস্ত্রিভির্বর্ষৈর্যতাত্মনোঃ || ১২||
পরিতুষ্টা জগদ্ধাত্রী প্রত্যক্ষং প্রাহ চণ্ডিকা || ১৩||
দেব্যুবাচ || ১৪||
যৎপ্রার্থ্যতে ৎবয়া ভূপ ৎবয়া চ কুলনন্দন |
মত্তস্তৎপ্রাপ্যতাং সর্বং পরিতুষ্টা দদামিতে || ১৫||
মার্কণ্ডেয় উবাচ || ১৬||
ততো বব্রে নৃপো রাজ্যমবিভ্রংশ্যন্যজন্মনি |
অত্রৈব চ নিজং রাজ্যং হতশত্রুবলং বলাৎ || ১৭||
সোঽপি বৈশ্যস্ততো জ্ঞানং বব্রে নির্বিণ্ণমানসঃ |
মমেত্যহমিতি প্রাজ্ঞঃ সঙ্গবিচ্যুতিকারকম্ || ১৮||
দেব্যুবাচ || ১৯||
স্বল্পৈরহোভির্নৃপতে স্বং রাজ্যং প্রাপ্স্যতে ভবান্ || ২০||
হৎবা রিপূনস্খলিতং তব তত্র ভবিষ্যতি || ২১||
মৃতশ্চ ভূয়ঃ সম্প্রাপ্য জন্ম দেবাদ্বিবস্বতঃ || ২২||
সাবর্ণিকো মনুর্নাম ভবান্ভুবি ভবিষ্যতি || ২৩||
বৈশ্যবর্য ৎবয়া যশ্চ বরোঽস্মত্তোঽভিবাঞ্ছিতঃ || ২৪||
তং প্রয়চ্ছামি সংসিদ্ধ্যৈ তব জ্ঞানং ভবিষ্যতি || ২৫||
মার্কণ্ডেয় উবাচ || ২৬||
ইতি দত্ত্বা তয়োর্দেবী যথাভিলষিতং বরম্ |
বভূবান্তর্হিতা সদ্যো ভক্ত্যা তাভ্যামভিষ্টুতা || ২৭||
এবং দেব্যা বরং লব্ধ্বা সুরথঃ ক্ষত্রিয়র্ষভঃ |
সূর্যাজ্জন্ম সমাসাদ্য সাবর্ণির্ভবিতা মনুঃ || ২৮||
ইতি দত্ত্বা তয়োর্দেবী যথাভিলষিতং বরম্ |
বভূবান্তর্হিতা সদ্যো ভক্ত্যা তাভ্যামভিষ্টুতা ||
এবং দেব্যা বরং লব্ধ্বা সুরথঃ ক্ষত্রিয়র্ষভঃ |
সূর্যাজ্জন্ম সমাসাদ্য সাবর্ণির্ভবিতা মনুঃ || ক্লীং ওঁ ||
|| স্বস্তি শ্রীমার্কণ্ডেয়পুরাণে সাবর্ণিকে মন্বন্তরে দেবীমাহাত্ম্যে
সুরথবৈশ্যয়োর্বরপ্রদানং নাম ত্রয়োদশোঽধ্যায়ঃ || ১৩||
|| শ্রীসপ্তশতীদেবীমাহাত্ম্যং সমাপ্তম্ ||
|| ওঁ তৎ সৎ ওঁ ||
|| অথ অপরাধক্ষমাপণস্তোত্রম্ ||
ওঁ অপরাধশতং কৃৎবা জগদম্বেতি চোচ্চরেৎ |
যাং গতিং সমবাপ্নোতি ন তাং ব্রহ্মাদয়ঃ সুরাঃ || ১||
সাপরাধোঽস্মি শরণং প্রাপ্তস্ত্বাং জগদম্বিকে |
ইদানীমনুকম্প্যোঽহং যথেচ্ছসি তথা কুরু || ২||
অজ্ঞানাদ্বিস্মৃতের্ভ্রান্ত্যা যন্ন্যূনমধিকং কৃতম্ |
তৎসর্বং ক্ষম্যতাং দেবি প্রসীদ পরমেশ্বরি || ৩||
কামেশ্বরি জগন্মাতঃ সচ্চিদানন্দবিগ্রহে |
গৃহাণার্চামিমাং প্রীত্যা প্রসীদ পরমেশ্বরি || ৪||
সর্বরূপময়ী দেবী সর্বং দেবীময়ং জগৎ |
অতোঽহং বিশ্বরূপাং ৎবাং নমামি পরমেশ্বরীম্ || ৫||
যদক্ষরং পরিভ্রষ্টং মাত্রাহীনঞ্চ যদ্ভবেৎ |
পূর্ণং ভবতু তৎ সর্বং ৎবৎপ্রসাদান্মহেশ্বরি || ৬||
যদত্র পাঠে জগদম্বিকে ময়া
বিসর্গবিন্দ্বক্ষরহীনমীরিতম্ |
তদস্তু সম্পূর্ণতমং প্রসাদতঃ
সঙ্কল্পসিদ্ধিশ্চ সদৈব জায়তাম্ || ৭||
যন্মাত্রাবিন্দুবিন্দুদ্বিতয়পদপদদ্বন্দ্ববর্ণাদিহীনং
ভক্ত্যাভক্ত্যানুপূর্বং প্রসভকৃতিবশাৎ ব্যক্তমব্যক্তমম্ব |
মোহাদজ্ঞানতো বা পঠিতমপঠিতং সাম্প্রতং তে স্তবেঽস্মিন্
তৎ সর্বং সাঙ্গমাস্তাং ভগবতি বরদে ৎবৎপ্রসাদাৎ প্রসীদ || ৮||
প্রসীদ ভগবত্যম্ব প্রসীদ ভক্তবৎসলে |
প্রসাদং কুরু মে দেবি দুর্গে দেবি নমোঽস্তু তে || ৯||
|| ইতি অপরাধক্ষমাপণস্তোত্রং সমাপ্তম্ ||