Ambika Trishati Lyrics
॥ অম্বিকাত্রিশতী ॥
গঙ্গাধরমখিবিরচিতা ।
Ambika Trishati Lyrics
॥ অম্বিকাত্রিশতী ॥
গঙ্গাধরমখিবিরচিতা ।
পরমাভরণং শম্ভোঃ পর্বতনাথস্য পুণ্যপরিপাকঃ ।
নিজলোচনবীক্ষণতো রক্ষিতলোকত্রয়ং চ তদ্রত্নম্ ॥ ১ ॥
নিগমান্তপরমবিদ্যা দদ্যাদদ্য প্রমোদমিহ নমতাম্ ।
নিখিলচরাচরচিন্ময়রূপং রক্ষাকরং চ লোকানাম্ ॥ ২ ॥
আদৃতশিববামান্তামার্যামার্যাভিমান্যমহিমানম্ ।
আগমমৌলিবতংসাং বন্দে চিদ্রূপকন্দলাং জননীম্ ॥ ৩ ॥
পরমশিবভাগধেয়ং সুরমুনিমনুজাদিভিঃ সদা ধ্যেয়ম্ ।
য়ন্নাম কর্ণপেয়ং পাতু সদা বেদমৌলিকামেয়ম্ ॥ ৪ ॥
জয়তি তবাম্ব কটাক্ষে কো বা সেবেত কল্পভূমিরুহম্ ।
কামাদিহানিদোঽসৌ নমতাং সম্পত্প্রদানকৃতদীক্ষঃ ॥ ৫ ॥
ভুবনজননী পুরারেঃ মহিষী ভূষায়িতামৃতময়ূখা ।
কলিকলুষিতজনমেনং পাতু সুধাকারমঞ্জুলাপাঙ্গৈঃ ॥ ৬ ॥
নিখিলনিগমান্তবেদ্যা বিদ্যা পরমা পুরারিসর্বস্বম্ ।
য়মপাশভীতমেনং রক্ষতু জনমেনমদ্রিপতিকন্যা ॥ ৭ ॥
ধুতপদনতজনপাপা পরচিদ্রূপাপ্রেময়নিজরূপা ।
শশিমৌলিভাগধেয়ং জয়তি নগেশানকন্যকা মান্যা ॥ ৮ ॥
তব ভূধরেন্দ্রতনয়ে পাদাব্জং নিগমদীর্ঘিকাফুল্লম্ ।
উত্তংসয়ন্তি পুরুষা ধন্যাঃ কেচিত্ ত এব সুরমান্যাঃ ॥ ৯ ॥
শতমখনীলমণীনাং প্রভয়াচ্ছুরিতা তবাক্ষিয়ুগলশ্রীঃ ।
তারকবিভেদিবাহং নৃত্তোন্মুখমাতনোতি শরদি পথি ॥ ১০ ॥
কুবলয়সম্পত্প্রদমিহ বিলোচনং মাতরচলতনয়ে তে ।
মম মানসং তু চন্দ্রং কলয়তি তাপপ্রশান্তিদং সময়ে ॥ ১১ ॥
নিজগতিজিতকাদম্বামম্বামম্ভোজলোচনাং বন্দে ।
সম্ভাবয়তি মহেশো য়াং কিল কালেষু হৃদ্যনব্যরসৈঃ ॥ ১২ ॥
ললিতগুণরত্নভূষাপেটী শুকমান্যনৈজবাগ্ধাটী ।
আশ্রিতকদম্ববাটী জয়তি পরানন্দজাতপরিপাটী ॥ ১৩ ॥
কুসুমশরবৈরিকান্তা কান্তালকভারললিতাফালান্তা ।
নিখিলনিগমান্তসারা সা রজতি শম্ভুভাগ্যধারা হি ॥ ১৪ ॥
করকমলকলিতচাপে পরমানন্দৈককন্দলে শম্ভোঃ ।
কনকমণিললিতকণ্ঠে ত্বামেবাহং ভজামি পরবৃত্ত্যৈ ॥ ১৫ ॥
চিন্তিতফলদে পুংসাং প্রবলতরামোদকন্দলে শম্ভোঃ ।
পুণ্যানাং পরিপাকং ত্বত্পদপদ্মং প্রফুল্লমিহ চিত্তে ॥ ১৬ ॥
নিজমৌলিলসনশশিকরবিলাসিধম্মিল্লকুবলয়ামোদৈঃ ।
ততমধুকরগীতীনাং দম্ভাদম্ব ত্বদীয়বাগ্রক্ষা ॥ ১৭ ॥
ললিতকুটিলালকান্তা কান্তা শম্ভোরমেয়বিভবান্তা ।
সম্পদমিহ নস্তনুতে কুলভূধরনাথভাগ্যপরিণামঃ ॥ ১৮ ॥
জনতাচিরতরবিরচিতসুচরিতপরিপাকরূপমমরেড্যম্ ।
কুসুমশরবৈরিভাগ্যং লসতু কলিক্ষোভহানয়ে মনসি ॥ ১৯ ॥
বিনতালিবিভবদা তে কটাক্ষধারা বিভাতি লোকাম্ব ।
কুসুমশরশাস্ত্রসিদ্ধিপ্রদা গিরীশস্য য়োগিহৃদ্দীপা ॥ ২০ ॥
নিত্যকুমারী কালে কাপি পয়োজাসনাদিনুতিতুষ্টা ।
শিতিকণ্ঠভাগ্যরক্ষাসূত্রং তনুতে স্ববৈভবৈর্হৃদ্যৈঃ ॥ ২১ ॥
নিখিলনিগমান্তসারং য়াবদ্রূপং মদম্ব পশ্যামি ।
সা তু নিয়মিতদূতগণো দূরে য়াত্যমিতকোপকোপকোঽপি য়মঃ ॥ ২২ ॥
শিববামভাগভূষা কাচিদ্ য়োষা নতালিকৃতভাষা ।
তাটঙ্করত্নভূষারুচিভরকাষায়িতাত্মমুখবেষা ॥ ২৩ ॥
বাণীশবিনুতমহিমা পরমা চ কলা সতাং সমারাধ্যা ।
হিমভূধরবরকন্যা কৃতভূসুরসৌখ্যসম্পদারান্মে ॥ ২৪ ॥
শিথিলিতভবভীতিততিং ভূধরকন্যামহং সদোপাস্যাম্ ।
আনন্দাদ্বৈতকলাং ভজে কলিক্ষোভহানয়ে নিভৃতম্ ॥ ২৫ ॥
নবরত্নখচিতভূষাততিভানীরাজিতাখিলাঙ্গীং তাম্ ।
কামপি কলামুপাসে সততানন্দৈককন্দলীং জননীং ॥ ২৬ ॥
মম হৃদয়কেলিভবনে বিলসতি তদ্রূপমিষ্টদং পুংসাম্ ।
য়দিহাদরেণ শম্ভুর্লোকত্রয়রক্ষণায় চকমে চ ॥ ২৭ ॥
গঙ্গাধরবরভূষা ভঙ্গায়াস্মাকমখিলদুরিতানাম্ ।
শৃঙ্গারসারবেষা তুঙ্গানন্দপ্রদাস্তু জগদম্বা ॥ ২৮ ॥
তেন বয়ং পরতন্ত্রাঃ য়চ্ছশিশেখরমনশ্বরৈশ্বর্যম্ ।
শম্ভোরিহ লোকানাং চিন্তামণিরাদিমঃ সুলভ্যশ্চ ॥ ২৯ ॥
নয়নাঞ্জনকলিকেয়ং শম্ভোরম্ভোজলোচনা চপলা ।
শ্রুতিসুদতীসূত্রকলা মম হৃদি ভবনে বিকাসমুপয়াতি ॥ ৩০ ॥
কুচকুম্ভাঙ্কিতশম্ভুং করপদ্মাদৃতপয়োজমণিমালাম্ ।
নতজনভরণাসক্তামম্বামম্ভোজলোচনাং নৌমি ॥ ৩১ ॥
বালমরালীলীলাং বালাং বলিবৈরিবাসবাদিনুতাম্ ।
জগদম্বামালম্বাং নিবিডনিতম্বাং হিতার্থমবলম্বে ॥ ৩২ ॥
ধ্যানৈর্বেদ্যং তত্ত্বং মীনধ্বজবৈরিমহিতভাগ্যং তত্ ।
ভূধরকন্যারূপং বিহরতি মম মানসে হততমস্কে ॥ ৩৩ ॥
মুনিজনমান্যচরিত্রা নানাদেশেষু লসিতবহুপীঠা ।
সর্বস্বসম্প্রদায়ঃ শম্ভোরম্বা মমাঞ্জলিপ্রীতা ॥ ৩৪ ॥
বাচামগোচরং তত্ পুরাতনীনামপীহ নতসুলভম্ ।
গিরিজারূপং তেজো ভাতু গিরীশার্ধমাদরাদক্ষ্ণোঃ ॥ ৩৫ ॥
মন্দস্মিতেন মধুরা মধুরাপীঠস্থিতা চ হরভাগ্যম্ ।
শীতলনয়নাসারৈঃ সিঞ্চতি মামঞ্জসা জগন্মাতা ॥ ৩৬ ॥
ভাতি পুরন্ধ্রী শম্ভোরিহ পুরতোঽস্মাকমাত্তসুমবাণা ।
সুমবাণবৈরিচিত্তাকর্ষণকুলিকা চ চিন্ময়ী পরমা ॥ ৩৭ ॥
লোচনপাতে শীতা পাতা পাদাম্বুজাত্তচিত্তানাম্ ।
শ্বেতা চ মন্দহসিতে শ্বেতারণ্যস্থিরপ্রদীপকলা ॥ ৩৮ ॥
পুরমথনমহিষি চিত্তে কুরু পদবিন্যাসমাত্তকুতুকা ত্বম্ ।
তেনৈবাহং ধন্যঃ কুরবৈ পুরবৈরিপাদপূজাং চ ॥ ৩৯ ॥
শতমখমুখসুরবন্দ্যে কান্তাশ্লেষেণ পুলকিতাঙ্গি ত্বাম্ ।
মনসা স্মরামি দয়সে তেনৈবাহং কলৌ য়ুগে ধন্যঃ ॥ ৪০ ॥
পুরমথনস্যাপি বপুঃ পুনতীমম্বাং নিজাক্রমণশক্ত্যা ।
চিরপুণ্যদর্শনীয়াং স্মরামি মনসা পরাং সুতামদ্রেঃ ॥ ৪১ ॥
কুঙ্কুমকণলসিতাঙ্গীং কুবলয়দৃশমব্জলোচনাং বন্দে ।
লোচনজিতসারঙ্গীং ভবমহিষীমর্ধচন্দ্রশেখরিণীম্ ॥ ৪২ ॥
নানালীলাখেলাং হররতিলোলাং হিতৈকপরিশীলাম্ ।
বন্দে বালাং ভূমিধরপতিকন্যাং সুরেশবহুমান্যাম্ ॥ ৪৩ ॥
সরসিজমৃদুলপদাব্জং পদাব্জবিন্যাসধন্যভূভাগম্ ।
মনসি নয়নে চ বাচি স্ফুরতু মহেশানমান্যসাম্রাজ্যম্ ॥ ৪৪ ।
শম্ভোঃ কুটুম্বিনী সা মধুকরমালালসত্স্বধম্মিল্লা ।
সৌভাগ্যদা সদা মে লসতু কৃপাপূরলালিতাপাঙ্গা ॥ ৪৫ ॥
ঊরীকৃতপুরমথনা দূরীকৃতদুষ্টরাক্ষসাদিগণা ।
নারী পরমা সৈষা ভেরীভাস্বত্করোরুহা ভাতি ॥ ৪৬ ॥
নিখিলোপনিষদ্বিদ্যাসারং সংসারবন্ধমোহহরম্ ।
হরমান্যং তত্ তেজো ভাতি সুরেশাদিরক্ষণোপায়ম্ ॥ ৪৭ ॥
শম্ভোরুত্সবধারা নবনবহারা সমাশ্রিতাধারা ।
সংবিদ্রূপারূপা কোপার্দিতদুর্জনা চ সা জয়তি ॥ ৪৮ ॥
পুণ্যসমুদায়সরণিং পুরহূতমুখৈরভিষ্টুতামম্বাম্ ।
ভজ মানস ভো নিত্যং নিত্যানন্দাদ্বয়াত্মিকাং দেবীম্ ॥ ৪৯ ॥
জীবিতসর্বস্বমিদং শম্ভোরম্ভোজলোচনং রত্নম্ ।
য়চ্চিন্তনেন ধন্যা বৈমানিকবন্যকলিতবিশ্রামাঃ ॥ ৫০ ॥
অন্তস্তমোনিহন্ত্রী সন্ধ্যাপূর্বা বিভাতি গিরিতনয়া ।
উদয়ে য়স্যা বিদুষাং বিলসন্তি করাম্বুজানি নক্তমপি ॥ ৫১ ॥
কুলগিরিনাথনূজে লোকাম্ব ত্বত্পদাম্বুজং জন্তুঃ ।
ভক্ত্যা স্মরতি হৃদি স্বে তত্পদয়ুগলং বহন্তি শিরসান্যে ॥ ৫২ ॥
মহিষাসুরমর্দনি তে ভীমং রূপং তদস্তু রিপুনেত্রে ।
সাদরকটাক্ষাপাতং পুরতো মম ভাতু সৌম্যরূপং তে ॥ ৫৩ ॥
আদৃতশুকাদিবাণী বাণীশসুরেশহরিমুখৈঃ স্তুত্যা ।
সুমলসিতমৃদুলবেণী বিলসতি কৈলাসপীঠিকামধ্যে ॥ ৫৪ ॥
দয়মানমানসং তত্ স্ময়মানমুখং নিরীক্ষ্য তত্তেজঃ ।
নিয়মাদিবিধুতপাপা বয়মানন্দাশ্রুঝরপরীতাঙ্গাঃ ॥ ৫৫ ॥
ললিতগতিং সুরবিনুতিং লসিতমতিং কিঞ্চ য়তিমনোজুষ্টাম্ ।
তব মূর্তিমম্ব পার্বতি কদা নু পশ্যন্ নয়ামি কলিকালম্ ॥ ৫৬ ॥
কুরুতে মনসি মদীয়ে বিহারলীলাং নগেন্দ্রবরকন্যা ।
তাবদ্ বিলসতি চিন্ময়তত্ত্বং তত্ত্বার্থিভিঃ সমারাধ্যম্ ॥ ৫৭ ॥
শঙ্করমিশ্রিতদেহং শ্রুতিসুদতীমৌলিভূষণং তেজঃ ।
মুখজিতচন্দ্রং তন্মে প্রসীদতু ক্ষিপ্রনম্রপাপহরম্ ॥ ৫৮ ॥
বিধুমৌলিবিভ্রমশ্রীর্বিদ্রুমরুচিসোদরাত্মতনুকান্তিঃ ।
সিঞ্চত্যমৃতমিহাক্ষ্ণোশ্চিরপুণ্যবশাদিহাসেব্যম্ ॥ ৫৯ ॥
পরকৈবল্যানন্দপ্রাপ্তিস্তেষাং ধ্রুবং হি তনুভজাম্ ।
য়েষাং চিত্তে বিত্তাধিপমুখসেব্যা বিহারভাগ্ গৌরী ॥ ৬০ ॥
গৌরি তব পাদপদ্মং শশধরকলয়াঙ্কিতাত্মমৌলিতলে ।
মম চান্তিমপ্রয়াণে বিলসতু নেত্রে স্মৃতৌ চ হৃদি বাচি ॥ ৬১ ॥
শঙ্করসুকৃতসমূহা কিঙ্করদেবাদিরঙ্কবীণা চ ।
শঙ্কাদিমোহহন্ত্রী লসতু মমাক্ষ্ণোঃ শশাঙ্কমৌলিতলা ॥ ৬২ ॥
কুচকুম্ভাশ্লেষবশাদাহৃতহরচিত্তবৃত্তিরমরাণাম্ ।
মনুজানামপি নিত্যং দৈবতমেষা চকাস্তি গিরিকন্যা ॥ ৬৩ ॥
পরিতুষ্টা হরভজনে নিজগলকলগীতিবিজিতপরপুষ্টা ।
সূচিতসুররিপুকষ্টা পরমকলত্রং হরস্য তজ্জয়তি ॥ ৬৪ ॥
সততালোলিতদয়য়া দৃশাম্ব মাং পশ্য সরসিজাতরুচা ।
পরমশিবে নির্বৃত্তিমহমবাপ্য তেনৈব তাবকো ভক্তঃ ॥ ৬৫ ॥
সরসকবিতা চ সম্পচ্চাক্ষোভ্যং মণ্ডলাধিপত্যং চ ।
ননু জায়তে নৃণাং কিল তব বীক্ষাবৈভবেন ভবকান্তে ॥ ৬৬ ॥
ত্বন্মৌলিচন্দ্রবিসৃমরকরধারাভিঃ কৃতাভিষেকা ত্বম্ ।
দ্বিগুণিতদয়ার্দ্রহৃদয়া পরিপুষ্যসি মঙ্গলানি ভক্তানাম্ ॥ ৬৭ ॥
গৌরি নগাধিপতনয়ে শশিশেখরদিব্যমহিষি মাং পাহি ।
ইতি কিল কলিতাঞ্জলয়ঃ সেবন্তে সুরনরাদয়ো নিত্যম্ ॥ ৬৮ ॥
পরমেশ্বরদয়িতে ত্বত্পদপদ্ময়ুগার্চনারতাঃ সন্তঃ ।
কলয়ন্তি গাঙ্গসলিলং পুষ্পাণ্যপি ভক্তিভারসম্পন্নাঃ ॥ ৬৯ ॥
শৃঙ্গারাগমসারা তব লীলা জয়তি চেতসি ভবস্য ।
অত এব স্বাঙ্গে ত্বামারোপয়দাশু বিজিতকামোঽপি ॥ ৭০ ॥
ননু মাতরম্ব মন্দস্মিতলীলাদিকমুদীক্ষ্য শশিমৌলিঃ ।
বিরহাসহিষ্ণুরনিশং বহতি ত্বাং নৈজবপুষি সানন্দম্ ॥ ৭১ ॥
তব শঙ্করি ভূষোরগলসদুরুমণিদম্ভতঃ শিবঃ কালে ।
নীরাজনমাতনুতে ভক্তহিতার্থী সুমঙ্গলাবাপ্ত্যৈ ॥ ৭২ ॥
তব পাদভক্তিরম্ব ক্ষিতিধরতনয়ে তনোতি কবিসূক্তিম্ ।
অমরশ্রিয়মথ সহসা ধরাধিপত্যাদিকং নৃণাম্ ॥ ৭৩ ॥
আলোকনেন মাতস্তব মনুজানাং হৃদি স্থিতং চ তমঃ ।
গলতি হঠাত্ পাপালিঃ সহসামরলোকসম্পদাভাতি ॥ ৭৪ ॥
য়ঃ সূক্তিমালিকাভিস্তব পাদয়ুগং সমর্চয়তি জন্তুঃ ।
তত্পদয়ুগ্মং তু সুরাঃ কল্পমহীরুহসুমৈশ্চ গাঙ্গজলৈঃ ॥ ৭৫ ॥
পার্বতি তব মুখকমলালোকনতো গলিতসংশয়াঃ সন্তঃ ।
কৈবল্যরূপকন্দলমাসাদ্য বিধানতো জনা ভান্তি ॥ ৭৬ ॥
নন্বদ্রিসুতে মন্দস্মিতকান্তিমিষাত্ ত্বদীয়কীর্তিঝরী ।
দিক্সৌধাঞ্চলভাগে বিলসতি নতরক্ষণোত্থিতা জগতি ॥ ৭৭ ॥
করণবিহীনান্ মূঢান্ নরান্ সুরান্ পাসি য়োগিনোঽপি তথা ।
লোকাম্ব ভাবনাদ্যৈঃ কালে কালে নগেন্দ্রতনয়ে ত্বম্ ॥ ৭৮ ॥
নগরাজবংশসম্পদ্ দিব্যা কাচিদ্ বিভাতি হরমান্যা ।
গণপতিময়ূরবাহৌ য়ত্তনয়ৌ লোকসম্পদে জয়তঃ ॥ ৭৯ ॥
প্রতিদিনকলিতামেনামঞ্জলিকলিকামগাধিপতনূজে ।
অঙ্গীকুরুষ্ব দয়য়া তেনৈব বয়ং কৃতার্থাঃ স্মঃ ॥ ৮০ ॥
কল্যাণকেলিভাজনমিহ শর্বস্যাপ্রেময়তুষ্টিকলা ।
চন্দ্রকলাবিলসিতনিজমৌলিতলা ভাতু মানসে কাপি ॥